გერმანიაში სამუშაოდ წასული საქართველოს მოქალაქეები სამშობლოში დაბრუნდნენ. ისინი გერმანიაში მძიმე სამუშაო პირობებზე საუბრობენ და აპირებენ დასაქმების სააგენტოს უჩივლონ.
ერთ-ერთი მათგანის, ჯაბა ჩაჩანიძის თქმით, გერმანიაში რთული პირობები იყო როგორც საცხოვრებლად, ისე სამუშაოს ნაწილში.
“ეს რომ გვცოდნოდა, ასეთ პირობებში მოგვიწევდა ყოფნა და მუშაობა, არც ერთი არ წავიდოდით. ორ ადამიანს შეექმნა ჯანმრთელობის პრობლემა, რომელსაც ჩვენი ხარჯებით ვმკურნალობდით,”- აღნიშნა ჯაბა ჩაჩანიძემ.
კიდევ ერთ პირს, ნატო ფხალაძეს კი, რომელიც გერმანიაში სამუშაოდ იმყოფებოდა, გადაწყვეტილი აქვს, რომ დასაქმების სააგენტოს უჩივლებს.
“ეს კონტრაქტი როდესაც გაფორმდა გერმანიასა და საქართველოში, ისინი არც ფიქრობდნენ ჩვენს მოტყუებას. მაგრამ ფაქტია, რომ ჩვენ დავრჩით მოტყუებულები. პირველ რიგში, ვუჩივლებთ დასაქმების სააგენტოს წარმომადგენლებს, რადგან მათ დაგვარწმუნეს სამუშაოს პირობებში,”- აღნიშნა ნატო ფხალაძემ.
საქართველოს პროფესიული კავშირების გაერთიანების თავმჯდომარის მოადგილე ლავრენტი ალანია აცხადებს, რომ სამუშაოდ წასული ადამიანების უფლებებს დაიცავს.
rustavi2.ge
