მარიამ კეთილაძე 17 წლის ქუთაისელი გოგონაა, რომელიც საქართველოს ტურიზმის პოპულარიზაციის მიზნით ფოტოებს იღებს და ბლოგს ქმნის.
ახალგაზრდა ქუთაისელის ბლოგის შთაგონების წყაროდ ქვეყნის ოკუპაცია, პროტესტი და სამშობლოს სიყვარული გახდა.
“მეგა ტვ” მარიამ კეთილაძესა და მის შემოქმედებას გაგაცნობთ.
-ფოტოგრაფიასთან პირველი შეხების შესახებ მოგვიყევით
იქიდან გამომდინარე, რომ მამაჩემი ფოტოგრაფია აპარატი ბავშვობიდან მიჭირავს. რომლითაც ძირითადად ჩემს მშობლებს, მეზობლებს და ნათესავებს ვიღებდი. ეს ყველაფერი შემდეგ უფრო დიდ ინტერესში გადაიზარდა, რამაც დღეს გარკვეულწილად მაქცია მოყვარულ ფოტოგრაფად.
– როგორ ფიქრობ რითი შეიძლება იყოს შენი ფოტოები სხვებისგან გამორჩეული?
ვფიქრობ, რაც არუნდა ერთი კუთხიდან გადაიღონ ადამიანებმა ფოტოები, მაინც განსხვავებული გამოვა, ვინაიდან თითოეულ ფოტოს ახასიათებს ფოტოგრაფის განსხვავებული ნიშა. ამ ეტაპისთვის მხოლოდ იმას ვიტყვი, რომ ჩემს ფოტოებს გააჩნია თავისებური ხედვა. დანარჩენზე კი იმედია მომავალში ვიმსჯელებ.
– როგორ ფიქრობთ რა არის დღესდღეობით ფოტოგრაფიისთვის მთავარი, და არის თუ არა ჩარჩოები, სტანდარტები თქვენთვის ფოტოს გადაღების დროს?
ფოტოგრაფიას არ გააჩნია ჩარჩოები, ვინაიდან ის ხელოვნებაა. ვიტყოდი, რომ ის არის იმპრესიონიზმის ერთ-ერთი განხრა. დღესდღეისობით ფოტოგრაფიისთვის მთავარი მხოლოდ კარგი აპარატი არ არის, როგორც სამწუხაროდ ბევრს მიაჩნია. ამისათვის საჭიროა პირველ რიგში ღრმა ცოდნა და აღქმის უნარი. სტანდარტი მხოლოდ იმაში მდგომარეობს, რომ არ უნდა შეურაცხყოთ ფოტოგრაფიის ისტორია და არსი მხოლოდ იმიტომ, რომ თქვენ ეს მოგწონთ და art გგონიათ. თითოეულ კადრს უნდა ჰქონდეს თავისი აზრი და ისე ოსტატობით უნდა მოახერხოთ ვინმესთის თუნდაც ”თავის წაჭრა” რომ მნახველზე ზეგავლენა მოახდინოთ.
– მოგვიყევით თქვენი ბლოგის შესახებ
საიტის შექნის შესაძლებლობა ქუთაისის მერიის კონკურსის შედეგად მომეცა, ამიტომაც გადავწყვიტე ხორცი შემესხა ჩემი იდეებისთვის, რომლის ინსპირაციაც სამშობლოდან, საქართველოდან მოდის. ქვეყნის ოკუპაცია, პროტესტი და სოციალური ქსელის კამპანია გახდა ჩემი შთაგონების მიზეზიც. ვფიქრობ, თითოეული ბლოგი კარგად გადმოსცემს ჩვენი ქვეყნის და ერის სიდიადეს, სიმდიდრეს და მშვენიერებას. საქართველოს პოლიტიკური მდგომარეობა ყოველთვის იყო ჩემი ინტერესის საგანი, ამიტომაც მომავალ პროფესიასაც მას ვუკავშირებ.
-რატომ გადაწყვიტეთ რომ მხოლოდ პეიზაჟებით გადმოგეცათ თქვენი სათქმელი?
მიუხედავად იმისა, რომ ქუჩის ფოტოგრაფია ძალიან მიტაცებს, ვფიქრობ, როგორც პატარა ქართველ ფოტომოყვარულ გოგონას უნდა ამერჩია ჩემი გამოწვევა, რაც სწორედ პეიზაჟებშია. საინტერესოა ხალხის სახეები, რასაც ევროპელი და ამერიკელი ქუჩის ფოტოგრაფები გადმოსცემებ, თუმცა ჩემთვის წინა პლანზე ამჯერად საქართველო აღმოჩნდა. ძნელია გვერდი აუარო მის ბუნებრივ მშვენიერებას და ობიქტივი ადამიანებს მიუშვირო. პეიზაჟი არ არის მხოლოდ ბუნების მშვენიერების გადმოცემა, მას სწორი ხედვა და დრო სჭირდება, ამიტომაც ყველაზე მეტად კომფორტულად თავს სწორედ ამ კუთხით ვგრძნობ.
მარიამ კეთილაძე ქუთაისის ფიზიკა-მათემატიკის N41 საჯარო სკოლაში სწავლობს. ახალგაზრდა ფოტოგრაფი ყველას მოუწოდებს შეიცნონ და იმოგზაურონ საქართველოში.
ავტორი: ბაჩო ნადირაძე
