უკრაინის შინაგან საქმეთა მინისტრის მრჩეველი ანტონ გერაშჩენკო აცხადებს, რომ დროებით ოკუპირებულ დასახლებებში ათეულობით თუ არა ასობით გაუპატიურების შემთხვევა მოხდა და რიგ შემთხვევებში ეს უკრაინის სპეცსამსახურების მიერ მოსმენილი დამპყრობლების საუბრებით დასტურდება.
„ერთ-ერთ საუბარში ოკუპანტი აღიარებს, რომ მან გააუპატიურა უკრაინელი ქალი. რატომ არ გვაქვს წერილობით დადასტურებული ფაქტები? იმიტომ, რომ ოკუპირებულ ტერიტორიებზე ისინი, პირველ რიგში, მობილურ კავშირს თიშავენ და ხალხი დარეკვას ვერ ახერხებს. მეორეც, ადამიანები ძალიან შეშინებულები არიან. რეალურად, ისინი ოკუპანტების სრულ განკარგულებაში არიან, ოკუპანტები კი, თუ ამას საჭიროდ ჩათვლიან, უბრალოდ ესვრიან მშვიდობიან მოქალაქეებს” – განაცხადა გერაშჩენკომ რადიო „თავისუფლების” ეთერში.
„ჩვენი სპეცსამსახურის მუშაკების მიერ მოსმენილ საუბრებში ოკუპანტები ტრაბახობენ ასეთი „გმირობებით“. ისინი დაუსჯელად გრძნობენ თავს, მაგრამ ეს დიდხანს არ გრძელდება”, – განაცხადა ამ კვირაში უკრაინის შინაგან საქმეთა მინისტრის მოადგილე კატერინა პავლიჩენკომ.
რუსი ოკუპანტების მიერ ჩადენილი ამ ამაზრზენი დანაშაულების მასშტაბები იმდენად დიდია, რომ მათ მიერ გაუპატიურებული, ამჟამად პოლონეთში ლტოლვილებად მყოფი უკრაინელი ქალებისთვის ორსულობის შეწყვეტის უფლება მიცემისთვის პოლონელი დეპუტატები უკრაინიდან ლტოლვილთა დახმარების შესახებ სპეციალურ კანონში ცვლილებების შეტანას ითხოვენ.
პოლონელი მემარცხენე დეპუტატების მიერ წარდგენილი ცვლილების პროექტით, პროკურატურას დანაშაულთან დაკავშირებით აბორტზე თანხმობის შესახებ გადაწყვეტილების მისაღებად 7 დღე ექნება.
დეპუტატმა ანიტა აგნეშკა კუხარსკა-ძეჯიჩმა გუშინ, პარასკევს, სეიმში გამართულ პრესკონფერენციაზე განაცხადა, რომ უკრაინის პროკურატურამ უკვე დაიწყო დევნა „ომის ერთ-ერთი ყველაზე საზიზღარი დანაშაულის, გაუპატიურების” ბრალდებით. ამ დანაშაულის მსხვერპლნი, რუსი ჯარისკაცებისგან ძალადობაგანცდილი ქალები, პოლონეთშიც ხვდებიან, ისინი ჩამოდიან ჩვენთან როგორც სამხედრო ლტოვლილები”.
„იყო გაუპატიურება, რომელსაც, შესაძლოა, ორსულობა მოჰყვა. მათ რომ არ დასჭირვებოდათ უკრაინიდან გაქცევა, უკრაინული საავადმყოფოები რომ არ დაებომბათ, უკრაინაში იპოვნიდნენ დახმარებას. სამწუხაროდ, უკრაინული საავადმყოფოები იბომბება და უკრაინელი ქალები მოდიან ჩვენთან, პოლონეთში. ჩვენ გვინდა მათთვის ასეთ მძიმე, დამამცირებელ და ტრაგიკულ ვითარებაში, მათ რეალური დახმარება გავუწიოთ”, – აღნიშნა მემარცხენეების მიერ სპეციალურ კანონში შესწორების პროექტის ერთ-ერთმა ინიციატორმა.
ყველა გაუპატიურებული უკრაინელი ქალი, რომელიც პოლონეთში მოხვდა, არის როგორც ომის დანაშაულების, ასევე გაუპატიურების მსხვერპლი. გაუპატიურებული ქალი ყოველდღიურად განიცდის ტრამვულ სტრესს, ტკივილებს, რომელიც თანდათანობით ძლიერდება, პოლონეთის პროკურატურას კი კანონით არ აქვს განსაზღვრული ორსულობის შეწყვეტის შესახებ ადმინისტრაციული გადაწყვეტილების მისაღები დრო. ჩვენ ვთვლით, რომ პროკურორისთვის შვიდი დღე საკმარისია გაუპატიურების გამო ორსულობის შეწყვეტის შესახებ ადმინისტრაციული გადაწყვეტილების მისაღებად, – დასძინა კუხარსკა-ძეჯიჩმა.
მემარცხენე დეპუტატებმა ასევე მოითხოვეს ჯანდაცვის მინისტრისგან უზრუნველყოს, რომ ყველა პოლონელ ან უკრაინელ ქალს, რომელიც გააუპატიურეს და დაორსულდა, შეეძლოს ორსულობის შეწყვეტა ნებისმიერ საჯარო საავადმყოფოში. მათი თქმით, გაუპატიურებულ ქალებს არ უნდა სჭირდებოდეთ ჟეშოვიდან შჩეცინამდე, ლუბლინიდან ზიელონა გორამდე გამგზავრება და უნდა შეეძლოთ ორსულობის შეწყვეტა საცხოვრებელთან რაც შეიძლება ახლოს.
