პარიზში, ევროპული მემკვიდრეობის დაჯილდოებაზე მუცოს „საზოგადოების რჩეულის“, მისი რეაბილიტაციის პროექტს კი -,,ევროპა ნოსტრას“ ჯილდო გადაეცა.
საქართველოს კულტურული მემკვიდრეობის დაცვის ეროვნული სააგენტოს საზოგადოებასთან ურთიერთობის სამსახურის უფროსი ამ ფაქტს თავის ფეისბუკ გვერდზე ეხმაურება:
“არის, ასერულდა ოცნება!!!!!!! მუცო ევროპის რჩეულია!!!! მუცო ქართველი ხალხის რჩეულია!!!! პირიქითა ხევსურეთის აღდგენილმა პატარა სოფელმა დღეს კიდევ ერთი სიცოცხლე ჰპოვა… მუცოს სახელი ევროპულ რუქაზე მსხვილი ასოებით ჩაეწერა… რესტავრაციის პროექტმა დღეს პარიზში კულტურული მემკვიდროების სამიტზე საზოგადოების რჩეულის პრიზი მოიპოვა….
ესაა ქვეყნის სახელი… ქვეყნის, რომლის თითოეული მოქალაქის ძალისხმევამ და თანადგომამ განაპირობა ჩვენი უდიდესი გამარჯვება… თქვენ მუცოს მომავალი განსაზღვრეთ!!!!!
ბედნიერი ვარ ჩემი საქმით, ჩემი კოლეგებით, ჩემი მუცოთი, ჩემი ქვეყნით!!!!!” – წერს ბექა ბარამიძე
სამიტზე მუცოს რეაბილიტაციის პროექტი 27 გამარჯვებულს შორის დასახელდა, რომელიც კომპეტენტური ჟიურის მიერ 34 ქვეყნის 149 განაცხადიდან შეირჩა.
პროექტი კონკურსზე, საქართველოს კულტურული მემკვიდრეობის დაცვის ეროვნულმა სააგენტომ 2018 წელს წარადგინა. ცერემონიას სხვადასხვა ქვეყნიდან 1000-ზე მეტი სტუმარი დაესწრო, მათ შორის იყვნენ საქართველოს დელეგაციის წევრებიც. პარიზში ღონისძიებას საქართველოს პრეზიდენტი სალომე ზურაბიშვილი ესწრებოდა.
საქართველოს რესტავრაციის ისტორიაში ერთ-ერთი ურთულესი და მასშტაბური ძეგლის, მუცოს აღდგენისა და გადარჩენის პროექტს 2014 წლიდან საქართველოს მთავრობის, განათლების, მეცნიერების, კულტურისა და სპორტის სამინისტროსა და ფონდ „ქართუს“ მხარდაჭერით, კულტურული მემკვიდრეობის დაცვის ეროვნული სააგენტო ახორციელებს.
