ქუთათელ-გაენათელი მიტროპოლიტის იოანეს (გამრეკელი) გადაწყვეტილებითა და დავალებით, საქართველოში წმინდა საყდრის (ვატიკანი) ელჩის, მთავარეპისკოპოს ჟოზე აველინო ბეტანკურისა და მისი თანმხლები პირების ქუთაისის ყოფილ კათოლიკურ ტაძარში (ამჟამად ყოვლადწმიდა ღმრთისმშობლის ხარების სახელობის მართლმადიდებლური ტაძარი) არშეშვების გამო, შესაძლოა, უცხოეთში საქართველოს მართლმადიდებელი ეკლესიის სამრევლოების არსებობასა და ფუნქციონირებას პრობლემები და საფრთხე შეექმნას, ვინაიდან უცხოეთის ქართული მართლმადიდებელი სამრევლოები, თითქმის სრული შემადგენლობით წირვა-ლოცვას აღავლენენ რომის კათოლიკე ეკლესიის მიერ მათთვის კეთილი ნებით დათმობილ კათოლიკურ ტაძრებში (ძირითადად დასავლეთ ევროპის ტერიტორიაზე).
აღნიშნულთან დაკავშირებით, დასავლეთ საქართველოში კათოლიკე ეკლესიის ვიკარიუსმა და ქუთაისის კათოლიკური სამრევლოს წინამძღვარმა, მამა გაბრიელე ბრაგანტინმა მედიაპორტალ Catholic.ge-სთან ინტერვიუში განაცხადა:
“მიუხედავად იმისა, რომ განსხვავებული ტრადიციები გვაქვს /კათოლიკეებსა და მართლმადიდებლებს/, მე მიხარია, რომ შეგვიძლია პატივი მივაგოთ აღმოსავლურ ხატებს, საგალობელს. ეს არის ჩვენი სიმდიდრე. რატომ აქვთ მუსლიმებს უფრო მეტი პატივისცემა კათოლიკური ტრადიციების მიმართ, რატომ? ეს მხოლოდ საქართველოში ხდება… უცნაურია, რომ როდესაც მართლმადიდებელი ქართველები იტალიაში არიან იქ შედიან კათოლიკურ ეკლესიაში. მათ კათოლიკე ეკლესია აძლევს სხვადასხვა ტაძარს, სადაც შეუძლიათ აღავლინონ თავისი ლოცვა. იტალიაში კათოლიკური ეკლესია ბედნიერია, რომ შეუძლია დახმარება. მაშინ ჩვენ უნდა დავწეროთ ჩვენი ეპისკოპოსების მიმართ, ნუ შეუშვებთ, რადგან ჩვენ მათთვის არავინ ვართ, ეშმაკები და ერეტიკოსები ვართო”, – აცხადებს მამა გაბრიელე.
“ვითმენთ, მაგრამ უტვინოები არ ვართ”, – აღნიშნა მამა გაბრიელე ბრაგანტინმა.
შეგახსენებთ, რომ დასავლეთ ევროპის ტერიტორიაზე მრავალი წლის მანძილზე ამ დრომდე ასიათასობით ქართველი მართლმადიდებელი იმყოფება ემიგრაციაში.
წყარო:wenews.ge
