ჰამასის ტყვეობიდან გათავისუფლებული 85 წლის იოხევედ ლიფშიცი თავისი ტყვეობის დეტალებს იხსენებს. ქალი დანარჩენ სამოქალაქო პირებთან ერთად 7 ოქტომბერს ჰამასის ტერორისტებმა გაიტაცეს.იოხევედ ლიფშიცმა თელ ავივის იხილოვის საავადმყოფოს წინ ჟურნალისტების წინაშე ისაუბრა.
85 წლის იოხევედ ლიფშიცის თქმით, კიბუც ნირ ოზიდან ის მოტოციკლეტით გაიტაცეს და შემდეგ მიწისქვეშა გვირაბების დახლართული ქსელები გაიარა. ნირ ოზის 400 მცხოვრებლიდან 180 მოკლეს ან გაიტაცეს.
“მე ჯოჯოხეთში ჩავედი, რასაც ვერასდროს ვიფიქრებდი” – თქვა იოხევედ ლიფშიცმა.
ლიფშიცის ცნობით, ტერორისტებმა მას საათი და სამკაულები წაართვეს და აიძულეს გარრკვეული მანძილი ფეხით გაევლო სანამ გვირაბის ჩასასვლელამდე მივიდოდნენ. ქალი ღაზის სექტორის გვირაბების ქსელს ობობის ქსელს ადარებს. გვირაბების ქსელის ერთ მონაკვეთში ქალი დიდ სივრცეში აღმოჩნდა, სადაც მის გარდა დაახლოებით 25 ტყვე კიდევ იმყოფებოდა. ქალის თქმით, 2-3 საათში რამდენიმე ხანშიშესულ მძევალთან ერთად განცალკევებულ ოთახში გადაიყვანეს, სადაც პერიოდულად ექიმები მიდიოდნენ.
იოხევედ ლიფშიცის 83 წლის ქმარი ოდედი ამჟამადაც ტყვეობაში იმყოფება. როგორც ცნობილია, ისინი ერთად არ ყოფილან დატყვევებულები და იოხევედმა ქმრის მდგომარეობის შესახებ არაფერი იცის.
