იმ ხალხს, რომლებიც დაზარალებულები არიან, დედა არ ჰყავდათ? მაინც და მაინც ჩემი შვილი უნდა მომკვდარიყო? – ციხეს მაშინ აქვს აზრი და წლებს, თუკი ის გამოასწორებს, ამათი გამოსწორება არ იქნება, ესენი არიან დაავადებულები, სისხლმოწყურებულები,- ამის შესახებ მასწავლებლის, გიგა ავალიანის დედამ, ეკა კუპატაძემ განაცხადა.
მისი თქმით, დასკვნითი სიტყვის მოსმენა მისთვის მძიმე იყო.
„ვაცნობიერებდი, რომ დასკვნითი სიტყვის მოსმენა მძიმე იქნებოდა მიუხედავად იმისა, რომ საქმის მასალები წერტილ-მძიმიანად ვიცი. თუმცა, მეტყველების უნარი მაქვს დაქვეითებული, რადგან უშუალოდ ჩემი შვილის მკვლელობის სურათი არ მქონდა ნანახი. ვუყურე ვიდეოს, რომელიც მე ნანახი არ მქონდა და შოკი მივიღე, დარბაზში დიდხანს ვერ გავჩერდი და გამოვედი.
ალექსანდრე გაბაშვილს ტელეფონში ძალადობებზე ჰქონდა „ფილმი“.
ამაზრზენი იყო დასკვნით სიტყვაში გაჟღერებული ფაქტები, კერძოდ რიკაძის ბებიის ჩანაწერი, რომელიც სახლში არის გადაღებული და ამბობს – „რამდენჯერ ვუთხარი, ამას ტელეფონში ნუ ინახავთქო“, ის კი არ უთქვამს ნუ ურტყამთო, არამედ – „ამას ტელეფონში ნუ ინახავთ, საშიშიაო“.
რიკაძის დედა ამბობს, რომ ალექსანდრე გაბაშვილის დედამ, ხათუნამ დამირეკაო და მითხრაო – „პოლიცია მოდის ჩხრეკაზეო“. მე რომ ვამბობ, რომ ფარული ზარებით ალექსანდრე გაბაშვილმა იცის რა დროს, რა ხდება, ეს მართალი ყოფილა და პროკურორმა ქეთი სონიძემაც დაადასტურა.
გიორგი რიკაძის დედას, თინათინ პაპასკირს შენახული და გამზადებული ჰქონდა ნეონაცისტური დაჯგუფებების დამახასიათებელი სიმბოლიკები და დარდობდა, რომ გადაყრა ვერ მოასწრო. იმას კი არ დარდობს, ხალხს ურტყამენ, არამედ ის, რომ გადაყრა ვერ მოასწრო. ეს კი გარკვეულწილად აღიარებითი ჩვენებაა.
ასევე, ჩანს, რომ „ორ ნაბიჯში“ შედის სამი მოძალადე, იქიდან ახალგაზრდა გამოჰყვათ და მოლარე მეორე თანამშრომლებს ეუბნება, კარები დაკეტე კიდევ არ შემოვიდნენო. ის კი არა, რომ ხმა ამოიღოს და იყვიროს, რომ ასეთი რამე მოხდა.
იმ ხალხს, რომლებიც დაზარალებულები არიან, დედა არ ჰყავდათ? მაინც და მაინც ჩემი შვილი უნდა მომკვდარიყო? ყველა საშიში ხართ ამათ ხელში. ესენი არიან სისხლმოწყურებული ავადმყოფები. ამათი გამოსწორება არ იქნება. ციხეს მაშინ აქვს აზრი და წლებს, რომ თუკი ის გამოასწორებს, ამათი გამოსწორება არ იქნება, ესენი არიან დაავადებულები, სისხლმოწყურებულები“, – განაცხადა ეკა კუპატაძემ.
ცნობისთვის, გიგა ავალიანის გარდაცვალების საქმეზე სამართალდამცავებმა ჯამში 4 პირი დააკავეს. მათგან ალექსანდრე გაბაშვილს საქართველოს სისხლის სამართლის კოდექსის 117-ე მუხლის მე-2 ნაწილით წარედგინა ბრალდება, რაც ჯანმრთელობის განზრახ მძიმე დაზიანებას გულისხმობს, რამაც გამოიწვია სიცოცხლის მოსპობა, ხოლო გიორგი რიკაძეს და კიდევ ორ არასრულწლოვანს ბრალდება წარდგენილი ჰქონდათ სისხლის სამართლის კოდექსის 376-ე მუხლის პირველი ნაწილით, რაც დანაშაულის შეუტყობინებლობას გულისხმობს იმის მიერ, ვინც ნამდვილად იცის, რომ მზადდება და ჩადენილია მძიმე დანაშაული. არსებული ინფორმაციით, ახალგაზრდა მასწავლებლის, გიგა ავალიანის მკვლელობის საქმეზე დაკავებული ოთხი არასრულწლოვანიდან ორს ბრალდება დაუმძიმდა. არსებული ცნობებით, საქმე ეხება დ.ჩ.-სა და ა.ნ.-ს, რომელთაც პროკურატურა თავდაპირველად დანაშაულის შეუტყობინებლობას ედავებოდა. დ.ჩ.-ს გამოძიება ახლა ედავება ჯანმრთელობის განზრახ მძიმე დაზიანებას ჯგუფურად. ამასთან, ა.ნ.-ს პროკურატურა მძიმე დანაშაულის შეუტყობინებლობას ედავებოდა, ახლა განსაკუთრებით მძიმე დანაშაულის შეუტყობინებლობისთვის წაუყენეს ბრალი, რაც უფრო მძიმე მუხლია და ისჯება თავისუფლების აღკვეთით ვადით სამიდან 7 წლამდე.
