ტელეკომპანია ”მეგა ტვ”-ს ჟურნალისტი თამარ ქავთარაძე კუნკურსის ”ჟურნალისტები სოციალური ცვლილებებისთვის“ გამარჯვებული გახდა. ის იმერეთის რეგიონის რჩეულ ჟურნალისტად დასახელდა.
დაჯილდოება თბილისში ”მოხალისეობის ეროვნული ფორუმის ფარგლებში გაიმართა.
”მინდა მადლობა გადავუხადო ამ კონკურსის ორგანიზატორებს. ეს არის დიდი მოტივაცია ჩემთვის პირადად, რათა სამომავლოდ უფრო აქტიურად ვიყო საზოგადოების სამსახურში. არ ვიცი ეს გამარჯვება რამდენად მეკუთვნის, მაგრამ მინდა მადლობა გადავუხადო ყველა იმ ორგანიზაციას ვინც ჩათვალა რომ ამ სტატუსს ვიმსახურებ, ეს ჩემთვის დიდი ბედნიერებაა.” – განაცხადა თამარ ქავთარაძემ.
კონკურსი სამოქალაქო საზოგადოების ინსტიტუტი ევროკავშირისა და გერმანიის ეკონომიკური თანამშრომლობისა და განვითარების ფედერალური სამინისტროს მიერ დაფინანსებული პროექტის – „სამოქალაქო საზოგადოების განვითარების ინიციატივა“ ფარგლებში 2019 წელს გამოცხადდა.
კონკურსის მიზანი იყო საქართველოს მასშტაბით გამოევლინათ ის ჟურნალისტები, რომლებიც რეგულარულად და კომპეტენტურად აშუქებენ სამოქალაქო საზოგადოებას, მის წინაშე არსებულ გამოწვევებს, განვითარების შესაძლებლობებს და საზოგადოებრივი ორგანიზაციების საქმიანობას. ამასთანავე, თავიანთ საქმიანობაში ეყრდნობიან სამოქალაქო საზოგადოების ძირითად ფასეულობებს (ადამიანის უფლებები, მათ შორის უმცირესობათა უფლებები, სოციალური სამართლიანობა, ადამიანის ღირსების პატივისცემა, სიტყვის თავისუფლება, დემოკრატია, თანასწორობა და კანონის უზენაესობა), იცავენ ჟურნალისტური ეთიკისა და პროფესიონალიზმის მაღალ სტანდარტებს.
„სამოქალაქო საზოგადოების ინსტიტუტმა“ რეგიონული ჰაბების დახმარებით ჩაატარა საზოგადოებრივი ორგანიზაციების გამოკითხვა, გამარჯვებული ჟურნალისტების გამოსავლენად.
საზოგადოებრივ ორგანიზაციებს, საქართველოს ყველა რეგიონში, ჰქონდათ შესაძლებლობა, მათი რეგიონისა და ცენტრალური მედიის თითო გამორჩეული წარმომადგენელი დაესახელებინათ.
ორგანიზაციებს საკონკურსო კითხვარი 2019 წლის 28 დეკემბრამდე უნდა შეევსოთ. ერთ ორგანიზაციას ჰქონდა ერთი ხმა და მათ საერთო გადაწყვეტილება უნდა მიეღოთ.
გამარჯვებულად ის ჟურნალისტები დასახელდნენ, რომლებმაც თავიანთ რეგიონებში ყველაზე მეტი ხმა დააგროვეს, მათ შორის იმერეთში ყველაზე მეტი ხმა ორგანიზაციებისგან ტელეკომპანია ”მეგა ტვ”-ს ჟურნალისტმა თამარ ქავთარაძემ მიიღო.
”ეს იყო კარგი შესაძლებლობა საზოგადოებრივი ორგანიზაციებისთვის, გამოეხატათ მადლიერება და წაეხალისებინათ მედიის ის წარმომადგენლები, რომლებიც სამოქალაქო საზოგადოების ცხოვრებას და საზოგადოებრივი ორგანიზაციების საქმიანობას აქტიურად აშუქებენ.” – აცხადებენ ორგანიზაციაში.
17 იანვარს, მოხალისეობის ეროვნული ფორუმი – „შენთვის, ჩემთვის, ცვლილებებისთვის – მოხალისეობის დროა“ განათლების განვითარების და დასაქმების ცენტრის (EDEC) მიერ, საქართველოს ეროვნულ უნივერსიტეტში გაიმართა. ფორუმი ორგანიზებული იყო პროექტის „სამოქალაქო საზოგადოების განვითარების ინიციატივა” ფარგლებში, რომელსაც აფინანსებს ევროკავშირი, ხოლო თანადამფინანსებელია კონრად ადენაუერის ფონდი.
ფორუმი საქართველოში მოხალისეობის პოპულარიზაციას ეძღვნებოდა.
