სენაკის რაიონულმა სასამართლომ ძალაში დატოვა დაცული ტერიტორიების სააგენტოს გადაწყვეტილება, რომლითაც ბალდის კანიონი 40 წლით გადაეცა კერძო ,,კანიონი 350″ – ს.
ადგილობრივმა მცხოვრებლებმა ბალდის კანიონთან დაკავშირებით სასამართლოს ორი წლის წინ მიმართეს და იჯარის ხელშეკრულების გაუქმება მოითხოვეს.
“მოსამართლე დარეჯან კვარაცხელიას მიერ მიღებული გადაწყვეტილებით, რომლითაც არ დააკმაყოფილა ადგილობრივი მოსახლეობის სარჩელი, სინამდვილეში მან გაამართლა:
კორუფცია;ადგილობრივებზე ძალადობა;ბუნების განადგურების პროექტი.ამ საქმის განხილვისას, მოსამართლემ არაფრად ჩააგდო შემდეგი ფაქტები:
ბალდის კანიონის მალულად გაიჯარებით, დაირღვა მოსახლეობის კონსტიტუციური უფლება, რამდენიმე ადგილობრივი და საერთაშორისო კანონი.ყოფილი ჩინოვნიკების გამდიდრების მიზნით განადგურებისთვის გაიწირა ჩვენი სიმდიდრე – უნიკალური ბუნება;უმნიშვნელო აღმოჩნდა სისტემული კორუფცია დაცული ტერიტორიების სააგენტოში – ყოფილი თავმჯდომარე, ვალერიან მჭედლიძე წილებს ფლობს მისივე სააგენტოს მიერ გაიჯარებულ 10-მდე ბუნების ძეგლზე;ინვესტორი კომპანიის დირექტორი გიორგი მერკვილაძე ორჯერ დაესხა თავს მოსახლეობას და შედეგად, სისხლის სამართლის დანაშაულში ორჯერ იქნა დამნაშავედ ცნობილი. (თუმცა, რატომღაც, მხოლოდ 1000 ლარით დაჯარიმდა);კომპანიის თანამშრომელი ცივი იარაღით დაესხა ბალდის მოძრაობის წევრებსა და 7 ჭრილობა მიაყენა ჩვენს თანამებრძოლს.
დარეჯან კვარაცხელიამ კიდევ ერთხელ მწვანე შუქი აუნთო ხალხის ჩაგვრას – ვინც ჩვენი საერთო სიკეთის, ჩვენი მიწა-წყლის შესანარჩუნებლად შიშველი ხელებით, მშვიდობიანად და ღირსეულად იბრძვის და მიუხედავად ყოველდღიურად მზარდი ტერორისა, ბოლომდე იბრძოლებს!”- წერენ “ბალდის კანიონის შესანარჩუნებლად” მოძრაობის წევრები
