პარტია ”ევროპული საქართველო” ქუთაისში ამომრჩევლებს შეხვდა, საარჩევნო პროგრამა გააცნო და კანდიდატები კიდევ ერთხელ წარადგინა.
შეხვედრა მონპლეზირის თაღთან გაიმართა. ღონისძიებას პარტიის ლიდერები დავით ბაქრაძე, გიგა ბოკერია, გიგი უგულავა და სერგო რატიანი ესწრებოდნენ.
პარტიამ ”ევროპული საქართველო” ქუთაისში მაჟორიტარობის კანდიდატად ოთარ კახიძე, მერობის კანდიდატად კი ამირან ძოწენიძე ოფიციალურად წარადგინა. შეხვედრაზე ასევე ცნობილი გახდა რომ ხარაგაულის მერობისთვის ბესიკ ყრუაშვილი იბრძოლებს.
”ივანიშვილის მმართველობის 8 წლის თავზე მისი გვარი უდრის უიმედობას, უდრის კრიზისს, რომელსაც გრძნობს თითოეული ჩვენი მოქალაქე. ივანიშვილის საქართველოში ყველაფერს წყვეტს ფული და ეს არის ის უპერსპექტივობა, რასაც ის ქართველ ხალხს სთავაზობს, ამის სანაცვლოდ ჩვენ ვთავაზობთ გარდამტეხ ცვლილებებს.
ჩვენ გვაქვს მწყობრი გეგმა როგორ უნდა გამოვიდეთ კრიზისიდან. მე მიხარია რომ ჩვენი გუნდის ყველაზე ახალგაზრდა და ენერგიული წევრი სწორედ ქუთაისში იბრძოლებს გამარჯვებისთვის და შექმნის კონტრასტს. მე მივესალმები ჩვენი მერობის კანდიდატს ამირან ძოწენიძეს, მე მის პატიოსნებაში ეჭვი არ მეპარება, იმიტომ რომ ვიცნობ 20 წელიწადია, ის არის უპატიოსნესი, წესიერი ადამიანი. ჩვენ ვნახეთ რომ თვითმმართველობის არჩევნების შემდეგ ნახევარი მერები გადააყენეს ან დაიჭირეს, იმიტომ რომ ის ხალხი იყო პატრონ-ყმობის მიხედვით შერჩეული. ამირანი შერჩეულია ქუთაისელობის მიხედვით, კომპეტენციის და მომავლის ხედვის მიხედვით.” – განაცხადა პარტიის ”ევროპული საქართველო” ერთ-ერთმა ლიდერმა გიგი უგულავამ.
