თელავიდან “ევროპული საქართველოს” წევრის შვილი,19 წლის ზაქრო კუსრაშვილი გაიტაცეს. როგორც გატაცებული ვაჟის დედა, ნინო გალახვერიძე ამბობს, მისმა შვილმა ტელეფონზე დაურეკა და უთხრა რომ იტაცებდნენ, რის შემდეგაც მასთან კავშირი გაწყდა.
ოჯახი გატაცების ფაქტს დედის პოლიტიკურ აქტივობას უკავშირებს.
ნინო გალახვერიძის თქმით, სავარაუდო გამტაცებლები “ქართულ ოცნებასთან” დაკავშირებული პირები არიან.
ფაქტს გამოეხმაურა “ევროპული საქართველოს” თავმჯდომარე გიგა ბოკერია. როგორც მან აღნიშნა, სანამ ყველაფერი არ გაირკვევა პოლიტიკურ მოტივზე არ ისაუბრებს.
“ჩვენთვის, რამდენიმე საათის წინ გახდა ცნობილი, რომ ჩვენი პოლიტიკური გუნდის წევრი თელავის რაიონის სოფელ ნასამხრალის საკრებულოს წევრობის კანდიდატის ნინო გალახვარიძის შვილი იქნა გატაცებული ჩვენთვის ამ მომენტისთვის უცნობი პირების მხრიდან,
ამ ფაქტთან დაკავშირებით სამართალდამცავი ორგანოები არიან საქმის კურსში ჩაყენებული,
თქვენ იცით, რომ “ევროპულ საქართველოს” არასოდეს ავტომატურად არ უსვრია ტალახი.
ხელისუფლების მხრიდან სანამ არ ვიცით და არ გვაქვს საფუძველი, რომ პირდაპირ დავაბრალოთ პოლიტიკური მოტივი ამ ყველაფერს, მანამდე ჩვენ ამას არ ვაკეთებთ,
ოღონდ ამ შემთხვევაში ჩვენ გვაქვს ზოგადი ვითარებიდან გამომდინარე და დამატებით ოჯახის ინფორმაციაზე დაყრდნობით საფუძვლიანი ეჭვი, რომ ეს შეიძლება იყოს კავშირში იმ პირებთან, რომლებიც ახლო ურთიერთობაში არიან ადგილზე “ქართული ოცნების” საარჩევნო მანქანასთან და ადგილობრივ ხელისუფლებასთან,
სახელდება ვინმე კუპრაშვილის გვარი, ყველა შემთხვევაში იმისდა მიუხედავად რა გაირკვევა, რა არის მოტივი დანაშაულის ის ვითარება, რომელშიც შესაძლებელია, რომ კრიმინალურმა ჯგუფებმა ან კრიმინალური მიდრეკილების მქონდე ახალგაზრდებმა დღისით-მზისით მოიტაცონ ადამიანი არის პირდაპირი პასუხისმგებლობა ივანიშვილის რეჟიმის,
მის მიერ შექმნილი კლიმატის შედეგია ეს შესაძლებელი და როგორც წესი ის პირები, რომლებიც პოლიტიკური ან ნებისმიერი სხვა მოტივით ასეთ ქმედებებში არიან შემჩნეულნი კრიმინალური მიდრეკილებების ან კრიმინალში მხილებული პირები არიან წინასაარჩევნო პერიოდში პირდაპირ მიბმული „ქართული ოცნების“ საარჩევნო მანქანასთან,
ეს არის მათი საფირმო ნიშანი კამპანიის, ამიტომ არის განსაკუთრებულად საგანგაშო ეს შემთხვევა იმიტომ, რომ, როდესაც პოლიტიკურად აქტიური პირის ოჯახის წევრთან მიმართებაში ხდება ასეთი ფაქტები, სადაც ცნობილია, რომ ამას მოყვება მისი პოლიტიკური გუნდის “ევროპული საქართველოს” რეაქცია და მედიის ყურადღება, იქ სადაც ბედავენ ასეთ რაღაცას კიდევ უფრო დაუცველები არიან რიგითი მოქალაქეები,
ამიტომ ჩვენ პირდაპირ ვაკისრებთ პასუხისმგებლობას ქართული ოცნების ხელისუფლებას მიუხედავად იმისა რა მოტივი გაირკვევა საბოლოოდ ამ დანაშაულის, იმ კლიმატის გამო რაც მათ ქვეყანაში შექმნეს და მოვითხოვთ კატეგორიულად საჭირო ზომების მიღებას სამართალდამცავი ოგანოების მხრიდან, ის პირები ვინც ეს ძალადობა ჩაიდინა იქნან დასჯილი”, – განაცხადა ბოკერიამ.
