ინფექციური საავადმყოფოს სამედიცინო დირექტორის, მარინა ეზუგბაიას ინფორმაციით, თბილისის საერთაშორისო აეროპორტში, ჟენევა-სტამბოლის რეისით დღეს დილით, ქალი ჩამოფრინდა, რომელსაც თერმოსკრინინგი ჩაუტარდა და ტემპერატურა 38.1. დაუფიქსირდა.
ეზუგბაიას თქმით, ქალი ინფექციურ საავადმყოფოში, ბოქსირებულ განყოფილებაშია გადაყვანილი, თუმცა მის შემთხვევაში კორონავირუსი არ განიხილება.
„დღეს, დილით, აეროპორტში ჩამოფრინდა ქალბატონი ჟენევა-სტამბოლის რეისით, რომელიც წამოსული იყო ჩინეთიდან. თერმოსკრინინგი ჩატარდა, დაფიქსირდა ტემპერატურა 38.1. ეს ქალბატონი მაშინვე გაიყვანეს საიზოლაციო სივრცეში, სადაც მოხდა განმეორებით თერმომეტრიზაცია, ტემპერატურა აღენიშნა 37,5, მეტი არა“,-განაცხადა მარინა ეზუგბაიამ.
მისივე ინფორმაციით, ახალგაზრდა ქალი ჩინეთში, დუჯანიანის პროვინციაში, ქალაქ ჩენდუსთან 40- კმ-ში მასწავლებლად მუშაობდა, რომელიც კორონავირუსის გავრცელების ეპიცენტრიდან ქალაქ უხანიდან 1000 კილომეტრითაა დაშორებული. ეზუგბაიას განცხადებით, 25 წლის ქალმა აღნიშნული ტერიტორია 20 იანვარს დატოვა.
„როდესაც მან პროვინცია დატოვა, მაშინ ამ პროვინციაში ახალი კორონავირუსის დაფიქსირებული არცერთი შემთხვევა არ იყო. როცა ტერიტორია დატოვა, 2 კვირის განმავლობაში შვეიცარიაში იმყოფებოდა, ამ პერიოდში გამოვლინდა იმ პროვინციაში შემთხვევების მცირე რაოდენობა. დღეს დილით უკვე ჩამოფრინდა ჟენევიდან სტამბოლის გავლით ჩვენთან. ჟენევა-სტამბოლში არ ვიცი თერმოსკრინინგი ჩაუტარდა, თუ არა, მაგრამ იქ ტემპერატურა არ დაფიქსირებულა. ჩვენს აეროპორტში თერმოსკრინინგის შედეგად დაფიქსირდა ტემპერატურა. შემდგომში, ღრმა ჩაკითხვით გამოვლინდა ეს ეპიდსიტუაცია და პაციენტი ჩვენს ცენტრში მოიყვანეს, მოათავსეს საიზოლაციო, ბოქსირებულ განყოფილებაში, სადაც ცალკე შესასვლელი და ცალკე გამოსასვლელია, პაციენტი აბსოლუტურ იზოლაციაში იმყოფება ყველა სხვა პირისგან“,-განაცხადა ეზუგბაიამ.
მისივე ინფორმაციით, პაციენტის ზოგადი მდგომარეობა დამაკმაყოფილებელია და სტაბილურია.
„შემოსვლიდან, ამ დრომდე, მისი ტემპერატურა ნორმალურია. ჩატარებული გამოკვლევებით პნევმონია გამორიცხა, ანთების მარკერები მნიშვნელოვანი ცვლილებების გარეშეა. მას აქვს ჩივილები მხოლოდ ყელის ტკივილი და ჩახეხვის გრძნობა, სხვა არანაირი სუბიექტური ჩივილი პაციენტს არ აქვს. ობიექტური სტატუსით, პაციენტის მდგომარეობა აბსოლუტურად დამაკმაყოფილებელია,მას რაიმე მნიშვნელოვანი პათოლოგიური ცვლილებები არ აღენიშნება. ამ ეტაპზე ეს ქალბატონი ჩვენს ცენტრში 24 საათიანი დაკვირვების რეჟიმში იქნება, თუ ტემპერატურა არ მოიმატებს, ზოგადი მდგომარეობა დამაკმაყოფილებელი იქნება, განმეორებით კვლევებით თუ მნიშვნელოვანი ცვლილებები აღარ განმეორდება, გაეწერება“,-განაცხადა მან.
მისივე თქმით, ახალგაზრდა ქალი არ განიხილება კორონავირუსის შესაძლო შემთხვევად.
„ეს გოგონა არც ახლა, არც მომავალში არ განიხილება, როგორც ახალ კორონავირუსზე შესაძლო შემხთვევად. აღნიშნულის გათვალისწინებით, თუ მისი მდგომარეობა დამაკმაყოფილებელი იქნება, ის პირდაპირ ბინაზე გაეწერება“,-განაცხადა მარინა ეზუგბაიამ.
