ვინ შეძლებს ახალი პირადობის უფასოდ აღებას

1-ლი აგვისტოდან გაცემულ პირადობის ახალ მოწმობებზე QR კოდი და თითის ანაბეჭდი იქნება დატანილი.

1-ლი აგვისტოდან ახალი ვიზუალის პირადობის მოწმობებისა და პასპორტების გაცემა დაიწყება.

კერძოდ, მსგავს დოკუმენტებზე დიზაინის ცვლილების გადაწყვეტილება იუსტიციის სამინისტრომ 10 მარტს მიიღო. თავდაპირველად ცვლილება, 4 ივნისს უნდა ამოქმედებულიყო, თუმცა ივნისში სამინისტრომ გადაწყვიტა, რომ ეს ვადა 1-ელ აგვისტომდე გაეხანგრძლივებინა.

შესაბამისად, იუსტიციის სამინისტროს ბოლო გადაწყვეტილებით, 1-ლი აგვისტოდან დაიწყება განახლებული დიზაინის პირადობის ელექტრონული მოწმობის, ბიომეტრიული პასპორტის, ბიომეტრიული დიპლომატიური პასპორტისა და ბიომეტრიული სამსახურებრივი პასპორტის, დროებითი და მუდმივი ბინადრობის ელექტრონული მოწმობების, აგრეთვე, დროებითი საიდენტიფიკაციო ელექტრონული მოწმობის გაცემა.

რაც შეეხება ზემოთ ჩამოთვლილ ძველ მოწმობებს ანუ ახალი ბრძანების ამოქმედებამდე გაცემულ შესაბამის დოკუმენტებს, ისინი იმოქმედებს კანონმდებლობით განსაზღვრული ვადით.

ახალ პირადობის მოწმობებზე QR კოდი და თითის ანაბეჭდი იქნება

აღსანიშნავია, რომ იუსტიციის სამინისტროს გადაწყვეტილებით, ახალი დიზაინის თანახმად, პირადობის მოწმობა უნდა შეიცავდეს: სახელს; გვარს; სქესს; მოქალაქეობას; დაბადების თარიღს; დაბადების ადგილს; პირად ნომერს; ფოტოსურათს; პირადი ხელმოწერის ნიმუშს; მოწმობის გამცემი ორგანოს დასახელებას; მოწმობის გაცემის თარიღს; მოწმობის მოქმედების ვადას; QR კოდს, რომლის მეშვეობით შესაძლოა გადამოწმდეს დოკუმენტის ან/და პირის შესახებ ინფორმაცია, მფლობელის თითის ანაბეჭდს.

რაც შეეხება საქართველოს მოქალაქის ბიომეტრიულ პასპორტებს, სამინისტროს გადაწყვეტილებით, ახალი დიზაინის პასპორტი და სამგზავრო დოკუმენტი უნდა შეიცავდეს შემდეგ რეკვიზიტებს: მფლობელის: სახელს; გვარს; მოქალაქეობას; დაბადების თარიღს; პირად ნომერს; ფოტოსურათს; სქესს; დაბადების ადგილს; პირადი ხელმოწერის ნიმუშს; გაცემის თარიღს; მოქმედების ვადას; გამცემი ორგანოს დასახელებას; დოკუმენტის ტიპის შესახებ მითითებას; ქვეყნის კოდს; დოკუმენტის ნომერს; დოკუმენტის წვდომის კოდს (CAN – Card Access Number).

პირადობის მოწმობის საფასურის გადახდისაგან თავისუფლდებიან:

სოციალურად დაუცველი ოჯახის წევრები სრულად, რომელთა სარეიტინგო ქულა არ აღემატება 70 001–ს;

მეორე მსოფლიო ომის მონაწილეები სრულად;

საქართველოს ტერიტორიული მთლიანობისათვის ბრძოლაში დაინვალიდებული საქართველოს მოქალაქეები სრულად;

პირები, რომელთაც საქართველოს მოქალაქეობა მიენიჭათ საქართველოს პრეზიდენტის ინიციატივით სრულად;

სტუდენტები, რომლებიც სწავლობენ ავტორიზებულ უმაღლეს საგანმანათლებლო დაწესებულებებში და რომელთა სტატუსის გადამოწმება შესაძლებელია სააგენტოს მონაცემთა ბაზის მეშვეობით, პირადობის ელექტრონული მოწმობის აღნიშნული სტატუსით პირველად აღების შემთხვევაში თავისუფლდებიან განსაზღვრული მომსახურების საფასურის გადახდისაგან – 10 ლარით, ხელმეორედ 6 ლარით, ხოლო ფოტოსურათის საფასურის გადახდისაგან სრულად;

სტუდენტები, სტუდენტური მონაცემით პირადობის ელექტრონული მოწმობის განმეორებით მიღების დროს 10% – ით.

პირები, რომლებზეც შესაძლებელია გაიცეს პირადობის მოწმობა მკვეთრად ან მნიშვნელოვნად გამოხატული შეზღუდული შესაძლებლობის მქონე პირის სტატუსით დაწესებული მომსახურების საფასურისგან გათავისუფლდებიან 50%-ით.