კახი კავსაძე უკვე სახლშია. ყველასათვის საყვარელმა მსახიობმა კორონავირუსი დაამარცხა. ის მკურნალობას პირველ საუნივერსიტეტო კლინიკაში გადიოდა.
მსახიობის შვილი, ასევე მსახიობი ირაკლი კავსაძე, ამერიკიდან თავის ქალიშვილთან ერთად ერთი კვირის წინ ჩამოვიდა. მამა-შვილი კარანტინში იმყოფებოდა.
კახის შვილის ვიზიტს უმალავდნენ, რომ ემოციურად არ გადატვირთულიყო და კლინიკიდან გამოსულს, მონატრებული ვაჟი სიურპრიზად ენახა. გუშინ, გამოჯანმრთელებული მამის წამოსაყვანად, კლინიკაში სწორედ ირაკლი მივიდა.
“პრაიმტაიმს” მსახიობის ამჟამინდელ მდგომარეობაზე მისმა ძმამ, იმერი კავსაძემ უამბო.
სახლში მოსვლამ კახის დიდი ემოციები გამოიწვია. კარგად არის, თუმცა ცოტა უკმაყოფილოა, სახლი მოენატრა. დაეტყო, რომ სახლში ყოფნა და ჩვენი, ყველას ნახვა გაუხარდა.
დიდი ხანია კლინიკაში ამდენი ხნით არ წოლილა და როგორც ჩანს, მობეზრდა იქ ყოფნა. ჩემს მტერს საავადმყოფოში დიდხანს წოლა. ვერავის დაწყევლი ასე. სახლში რომ მოვიდა და ყველანი დავხვდით, შვილები, შვილიშვილები, მე, ძალიან გაბედნიერდა.
ბევრი არაფერი ულაპარაკია იქაურობაზე, არ უყვარს ამაზე საუბარი. დაწვა, დაიძინა. ირაკლი და ირინკა არიან მასთან. დღეს ისევ მივალ, მოვინახულებ.
primetime.ge
