საფრანგეთის პრეზიდენტი ემანუელ მაკრონი აცხადებს, რომ უკრაინაში ცეცხლის შეწყვეტა უახლოეს კვირებშია შესაძლებელი, თუმცა ეს მხოლოდ წინაპირობაა სრულფასოვანი სამშვიდობო მოლაპარაკებებისთვის. ამის შესახებ საფრანგეთის პრეზიდენტმა „ფოქს ნიუსთან“ ინტერვიუში ისაუბრა.
ჟურნალისტმა მაკრონს ჰკითხა, იზიარებს თუ არა იგი აშშ-ის პრეზიდენტის, დონალდ ტრამპის შეფასებას ომის დასრულების შესაძლებლობაზე უახლოეს კვირებში.
„იმედი მაქვს. ვფიქრობ, ყველას ახსოვს დანაკარგები და ის, რაც უკრაინელმა ხალხმა ბოლო სამი წლის განმავლობაში გადაიტანა. ისინი მხოლოდ იცავენ თავიანთ ტერიტორიასა და სუვერენიტეტს“, – აღნიშნა მაკრონმა.
საფრანგეთის პრეზიდენტის თქმით, დონალდ ტრამპის მოსვლა ცვლის თამაშის წესებს და რუსეთთან ურთიერთობის შესაძლებლობას იძლევა.
„ვფიქრობ, ეს შესაძლებელია უახლოეს მომავალში. მე მაღელვებს ის, რომ ჩვენ სწრაფად უნდა ვიმოქმედოთ და გვჭირდება ცეცხლის შეწყვეტა, რომელიც შეიძლება შეფასდეს და შემოწმდეს, ასევე სრულფასოვანი მოლაპარაკებები“, – განაცხადა მაკრონმა.
ემანუელ მაკრონის თქმით, საჭიროა სიფრთხილე, რადგან 2014 წელს ასევე შეთანხმდნენ ცეცხლის შეწყვეტაზე რუსეთთან, მაგრამ ყოველ ჯერზე რუსეთი არღვევდა მას.მაკრონის თქმით, ცეცხლის შეწყვეტა საჭიროა იმის სანახავად, თუ რამდენად ერთგულია რუსეთი საკუთარი დაპირებების.
