გიორგი კიკნაძის კვარტეტი საქართველოში ‘paysage’ ჯაზ კონცერტების სერიას მართავს. ჯაზ კონცერტების სერია სტარტს ქუთაისში აიღებს. ლადო მესხიშვილის სახელობის პროფესიულ სახელმწიფო დრამატულ კონცერტში კვარტეტის კონცერტი 19:00 საათზე დაიწყება. დასწრება უფასოა.
გიორგი კიკნაძის კვარტეტი კონცერტებს გამართავს, ასევე, თელავში (12 ოქტომბერი) და თბილისში (14 ოქტომბერი).
გიორგი კიკნაძე, ქართველი კონტრაბასისტი და კომპოზიტორი, საქართველოში დაიბადა და გერმანიაში მოღვაწეობს. ოჯახთან ერთად საცხოვრებლად გერმანიის ქალაქ ლიუბეკში წლების წინ გადავიდა, დაამთავრა ჰამბურგის მუსიკისა და დრამის უნივერსიტეტი. ის ქართველი კომპოზიტორის, რეზო კიკნაძის შვილია.
მუსიკოსი ხელმძღვანელობს საკუთარ კვარტეტსა და ტრიოს. ასევე, ანა-ლენა შნაბელის და გაბრიელ კობურგერის ბენდების წევრია, მონაწილეობს საერთაშორისო ფესტივალებში და უკრავს ისეთ მუსიკოსებთან ერთად, როგორებიც არიან ტილ ბრონერი, გარი თომასი, ადამ ნუსბაუმი, ზივ რავიზი, ფლორიან ვებერი, კრისტიან ლილინგერი, ჯონ შროდერი, კლაუს სტოტერი, ფილიპ გროპერი და სხვა.
გიორგიმ სადებიუტო ალბომი ‘paysage’ თავის დიდი ხნის კოლეგებთან და მეგობრებთან, საქსოფონისტ ფრანკ დელესთან, პიანისტ ლუკას კლაპთან და დრამერ კონრად ულრიხთან ერთად ჩაწერა. ჩანაწერი სავსეა მიძღვნებით. ერთი მხრივ ეძღვნება ადამიანებს, რომლებიც კომპოზიტორს აღაფრთოვანებენ. მათ შორის არიან კომპოზიტორი ალბან ბერგი, პისტოლიერო, უაილდ ბილ ჰიკოკი. მეორე მხრივ კი ჩანაწერი ეძღვნება ადამიანებს, რომლებიც გიორგის ორი სამშობლოდან, საქართველოდან და გერმანიიდან, სრულიად განსხვავებული ქვეყნებიდან არიან და რომელთაც გიორგი მეგობრებად და ოჯახის წევრებად მიიჩნევს.
გიორგი კიკნაძის კვარტეტი:
გიორგი კიკნაძე – კონტრაბასი, კომპოზიტორი
ფრანკ დელე – საქსოფონი
ლუკას კლაპი – როიალი
კონრად ულრიხი – დასარტყამი
Paysage კონცერტების სერიის ორგანიზატორია Kavkazz Jazz.
კონცერტების სერია ტარდება ქუთაისის მუნიციპალიტეტის მერიის და თელავი მუნიციპალიტეტის მერიის მხარდაჭერით.
