გიორგობის დღესასწაული ხონში ტრადიციულად სახალხო ზეიმით-ხონელობით აღინიშნება. უკვე მესამე წელია 6 მაისს მხოლოდ სადღესასწაულო წირვა აღევლინება, მიზეზი მერის განმარტებით, პანდემია და მოძმე ერის განსაცდელია, ასევე ის პროექტები, რომელიც ხონის ცენტრალურ ნაწილში მიმდინარეობს:
,,ძვირფასო თანაქალაქელებო, გილოცავთ გიორგობას და “ხონელობის” სახალხო დღესასწაულს!
პანდემიის გამო ბოლო ორი წელია არ აღგვინიშნავს ჩვენთვის ესოდენ მნიშვნელოვანი დღე. სამწუხაროდ, არც წელს გვაქვს საზეიმო განწყობა და შესაბამისი პირობები:
განსაცდელშია ჩვენი მოძმე ერი- უკრაინელები, ჩვენი მეგობარი იზიუმელები, რომლებიც დღიდან ხონთან დამეგობრებისა , იზიარებდნენ ჩვენს სადღესასწაულო განწობას…ტრაგედიაა, რაც მათ თავს ხდება და წარმოუდგენელია არ თანავუგრძნოთ…
გარდა ამისა, მიმდინარეობს მასშტაბური ინფრასტრუქტურული პროექტი – ქალაქ ხონის ცენტრალური ნაწილის სრული რეაბილიტაცია. ყველა იმ ლოკაციაზე , სადაც სახალხო დღესასწაულის ატრაქციებს ვმართავდით, მიმდინარეობს განახლებითი სამუშაოები.
მე მჯერა , რომ მომავალ 6 მაისს, დაძმობილებული ქალაქის დელეგაციებთან ერთად, განახლებულ ხონში ვიზეიმებთ . მსოფლიოში დაიმკვიდრებს სიმშვიდე , გვექნება ამაღლებული განწყობა და ჩვენი სახალხო დღესასწაული იქნება განსაკუთრებული, გამორჩეული როგორც ფორმით, ისე შინაარსით.
ჩემო ხონელებო, კიდევ ერთხელ გილოცავთ გიორგობის ბრწყინვალე დღესასწაულს,მშვიდობას და კეთილდღეობას გისურვებთ. წმინდა გიორგის ძალა და მადლი გფარავდეთ!”-ლადო ჯურხაძე.
