სამწუხაროა, როდესაც ხელისუფლება, რომელიც უნდა წარმოადგენდეს პროევროპელ ხალხს, ნაცვლად მათი ინტერესების ასახვისა, ქართველ ხალხს ჰპარავს ევროპულ მომავალს და შესაბამისად, ევროპელ ლიდერებს აყენებს იმ გამოუვალ მდგომარეობაში, რომ მათ უწევთ უვიზო მიმოსვლის დროებით შეჩერების მექანიზმის ამოქმედების განხილვა, – ამის შესახებ „ერთიანობა- ნაციონალური მოძრაობის“ ლიდერმა თინა ბოკუჩავამ ევროკავშირის 8 ქვეყნის საგარეო საქმეთა კომიტეტების თავმჯდომარეებთან შეხვედრის შემდეგ განაცხადა.
თბილისში ჩამოსულ ევროპულ დელეგაციას პრეზიდენტის შემდეგ სწორედ პროდასავლური ოპოზიციური გაერთიანებები შეხვდნენ. საუბრისა ა განხილვის მთავარი თემა კი 26 ოქტომბრის გაყალბებული არჩევნები და მისი გამოძიება იყო. ევროპელი პოლიტიკოსები მიიჩნევენ, რომ საჭიროა საერთაშორისო გამოძიება იმისთვის, რომ სიმართლე დადგინდეს.
ქართველმა პოლიტიკოსებმა მათ დეტალურად მიაწოდეს ინფორმაცია, რა ხდებოდა საარჩევნო უბნებზე და რა მეთოდები გამოიყენა ოლიგარქის პარტიამ სასურველი შედეგის დასაწერად.
“მოსალოდნელია ძალიან მტკივნეული ნაბიჯების გადადგმა, ეს არის ჩვეულებრივი პრაქტიკა, როდესაც ვისაც მიტაცებული აქვს ხელისუფლება ცდილობს გაატაროს ანტიევროპული პოლიტიკა, შესაბამისად ის იღებს პასუხს ევროპიდან – თუ არ გინდა ევროპულ ოჯახში ყოფნა , მაშინ დააბრუნე ჩვენი სახლის გასაღები” განაცხადა “ძლიერი საქართველოს” ერთ ერთმა ლიდერმა ბადრი ჯაფარიძემ.
„ვისაუბრეთ გამოძიების მექანიზმებზე, ყველაფერზე, მათ შორის, სანქციებზე, ევროპის მხრიდან გადასადგმელ ნაბიჯებზე, მაგრამ ვისაუბრეთ ისეთ ახალ მექანიზმებზე, რომლებზეც საჯაროდ არ ვაპირებთ ჯერ საუბარს, მაგრამ საზოგადოება დაინახავს, რომ ჩვენ გვაქვს ძალიან მკაფიო გეგმა, თუ როგორ უნდა მივაღწიოთ საბოლოო ჯამში, სამართლიანობას, რომ არჩევნები ახლიდან ჩატარდეს. პირდაპირ ვამბობ, რომ „ქართულ ოცნებას“ ძალიან მძიმე დღე ელის ქვეყნის შიგნით და ქვეყნის გარეთ. ამას თქვენ აუცილებლად დაინახავთ.
ისინი საერთაშორისო გამოძიებას მხარს უჭერენ და როდესაც ხელისუფლება უარს ამბობს, ეს კიდევ ერთი ნათელი მტკიცებულებაა, რომ ეს ადამიანები დამნაშავეები არიან და ცდილობენ დაფარონ საკუთარი ორგანიზებული სისტემური დანაშაულს, რომელიც ჩაიდინეს საქართველოს წინააღმდეგ,“ – განაცხადა გიორგი ვაშაძემ.
„მთავარი იყო მზაობა. ევროკავშირის სხვადასხვა ფრაქციიდან და სხვადასხვა კომიტეტიდან არიან, მაგრამ ერთნაირი მზაობაა, რომ გადადგმული იყოს ნაბიჯები, რათა ეს არჩევნები არ იყოს აღიარებული. საუბარი არც დაგვჭირდა იმაზე, რომ არჩევნები გაყალბებულია, პირდაპირ ითქვა: სხვადასხვა ტიპის სანქციები; სანქციების ჩამოსვლა ქვედა დონეზე, იმ ხალხზე, ვინც არჩევნები გააყალბა ცენტრალურ საარჩევნო კომისიაში. ასევე, [საუბარი იყო] სხვადასხვა ტიპის ზომაზე, რომ დაცული იყოს ქართველი ხალხის ნება.
წარმოიდგინეთ, სხვადასხვა ქვეყნის და სხვადასხვა კომიტეტის წარმომადგენლები არიან, მაგრამ ევროკავშირში პოლიტიკური ნება გადაწყვეტილია – ამ არჩევნების აღიარება არ მოხდება“,- განაცხადა ანა დოლიძემ.
ოპოზიციის ლიდერების შემდეგ, ევროპელმა დეპუტატებმა შეხვედრა უკვე არასამთავრობო და მედიაორგანიზაციებთან გამართეს.
