საპროტესტო აქციის მონაწილეებმა მინეაპოლისის პოლიციის შენობა დაიკავეს და ცეცხლი წაუკიდეს. შტატის გუბერნატორმა ქალაქში წესრიგის აღდგენის მიზნით, პოლიციის დასახმარებლად, ეროვნული გვარდიის ნაწილები გამოიყვანა.
https://www.youtube.com/watch?v=7wdHquFuDt8&feature=emb_logo
ოფიციალური ინფორმაციით, ფლოიდი კლინიკაში მიყვანის შემდეგ გარდაიცვალა. ამ ამბავს ჯერჯერობით მხოლოდ 4 პოლიციელის გათავისუფლება მოჰყვა, რამაც პროტესტი გამოიწვია.
ქალაქში მიმდინარე პროცესებს “ტვიტერის” პირადი გვერდის საშუალებით ეხმიანება აშშ-ის პრეზიდენტი, დონალდ ტრამპიც: ის საპროტესტო აქციის მონაწილეებს “ავაზაკებს“ უწოდებს. პრეზიდენტის თქმით, ის განზე ვერ გადგება და ვერ უყურებს, რა ხდება ამერიკის დიდ ქალაქში.
“ეს ავაზაკები ჯორჯ ფლოდის ხსოვნას შეურაცხყოფენ. მე ამას არ დავუშვებ, როდესაც ძარცვა-გლეჯა იწყება, სროლაც იწყება,“ – წერს აშშ-ის პრეზიდენტი.
აღსანიშნავია, რომ მინეაპოლისში მომხდარ შემზარავ ფაქტს პროტესტი მოჰყვა ჩიკაგოში, ლოს ანჯელესსა და მემფისში.
მინესოტას გუბერნატორის, ტიმ ვოლზის თქმით, მინეაპოლისში ძალიან საშიში ვითარებაა. იგი მოსახლეობას დამშვიდებისკენ მოუწოდებს. BBC-ის ცნობით, აქციის ორგანიზატორები ცდილობდნენ, რომ პროტესტის მშვიდობიანი ფორმა შეენარჩუნებინათ და ასევე კორონავირუსის საფრთხის გამო დაეცვათ სოციალური დისტანცია, თუმცა მოგვიანებით პროცესი უმართავი გახდა.
აქციის მონაწილეების მთავარი სლოგანი და შეძახილები ასეთია: “ვერ ვსუნთქავ“, “ის შეიძლება მე ვიყავი“, “შეწყვიტეთ შავკანიანების მოკვლა”.
პროტესტის ტალღას შეუერთდნენ პოპულარული ადამიანებიც. ისინი გმობენ მინეაპოლისში მომხდარ ფაქტს. ვარსკვლავები აღნიშნულს სოციალურ ქსელებში ეხმიანებიან და წერენ, რომ შავკანიანების დახოცვა უნდა შეწყდეს.
ნაომი ქემპბელი, სუპერმოდელი: სიტყვები არ მყოფნის, ცუდად ვარ და დავიღალე, დავიღალე სევდით ჩვენს ხალხზე, რომლებიც ტყუილად კვდებიან. ამ გამოწვევის დროს, ვფიქრობდი, რომ შეგვეძლო გაერთიანება, მაგრამ ჩანს, რომ კორონავირუსის დროსაც რასიზმი კიდევ უფრო ძლიერია. ეს სად დამთავრდება? მე შავი ვარ და ამაყი ვარ ამით.
დემი ლოვატო, მომღერალი: “მინდა, რომ შავკანიანებს მშვიდად ცხოვრება შეეძლოთ”. ლოვატომ ასევე მოუწოდა თავის მეგობრებს და განსაკუთრებით კი თეთრკანიანებს, რომ იბრძოლონ შავკანიანთა უფლებებისთვის.
ბიონსემ თავისი ვებ-გვერდის ქავერის ფოტო შეცვალა და ჯორჯ ფლოიდის ფოტო დააყენა.
ცნობილი ჩოგბურთელი, სტეფ კარი “ინსტაგრამზე” ჯორჯ ფლოიდის ფოტოს აქვეყნებს და წერს:
“თუ ეს ფოტო არ გაწუხებს, არ გაფორიაქებს, მაშინ არ ვიცი. ვხედავ, რომ ძალიან ბევრი ადამიანი ხმამაღლა საუბრობს და ცდილობს თქვას, როგორ მობეზრდათ და როგორი გაბრაზებულები არიან. ეს კარგია, მაგრამ ეს არის იგივე, იგივე, იგივე რეალობა, რომელშიც ვცხოვრობთ. ჯორჯს ოჯახი ჰყავს, ჯორჯი არ იმსახურებდა სიკვდილს, ის ევედრებოდა დახმარებას, თუმცა მისი ვედრება უგულებელყვეს”.
