ბორჯომში, ტრადიციული დღესასწაული „ბორჯომობა 2019“ აღნიშნეს. საზეიმო ღონისძიებები 11:00 საათიდან მრავალფეროვანი კულტურული, გასართობი და სპორტული აქტივობებით დაიწყო. მერაბ კოსტავას სახელობის ბაღში ქართულ ჭიდაობაში, მკლავჭიდში, გეზრბენში, ჭადრაკსა და ნარდში შეჯიბრებები გაიმართა. აქვე იყო განთავსებული ეთნოგრაფიული კუთხეები, ჩატარდა კულინარიული კერძების მასტერკლასიც.
ღონისძიებები პარალელურად ბორჯომის ცენტრალურ პარკშიც მიმდინარეობდა. გაიმართა კონცერტი ცეკვისა და სიმღერის ანსამბლების მონაწილეობით. სამეწარმეო მარკეტი, წამყვანი წიგნის გამომცემლობების გამოფენები, საბავშვო კუთხეები, ფოტო გადაღებები, „პოეზიის საათი“, ინსტრუმენტული ტრიო – სადღესასწაულო პროგრამის შემადგენელი ნაწილი იყო.
“ბორჯომობა 2019” გრანდიოზული გალა – კონცერტით ცნობილი შემსრულებლების მონაწილეობით დასრულდება.
ღონისძიებას ორგანიზება ბორჯომის მუნიციპალიტეტმა და ტურიზმის ეროვნულმა ადმინისტრაციამ გაუწიეს.
