მსახიობმა და რეჟისორმა ლორიტა ჯორჯიკიამ სამტრედიის მერიის შენობაში შიმშილობა დაიწყო.
ქალბატონი ამ ფორმით ცდილობს ქალაქის მერიას გადააფიქრებინოს მისი სახლის დემონტაჟი.
“სამტრედიისთვის ლორიტა ჯორჯიკია ერთ-ერთი ყველაზე კაშკაშა ვარსკვლავია, რომელიც უკვე ათეული წლებია რაც ერთგულად და უპრეტენზიოდ მოღვაწეობს იმისთვის, რომ ქალაქის კულტურული ცხოვრება ბოლომდე არ ჩაკვდეს.
მრავალი ჯილდოს, პრემიის თუ კონკურსების ლაურეატი და გამარჯვებული რეჟისორი დღეს უკიდურესად დამცირებული, დამფრთხალი და იმედგადაწურული იყო. მან პროტესტის ნიშნად მუნიციპალიტეტის მერიის პირველ სართულზე შიმშილობა დაიწყო და ამ უკიდურესი ფორმით გამოხატა დამოკიდებულება ზედამხედველეობის სამსახურის და ქალაქის მერიის მიმართ, რომლებიც დღე-დღეზე აპირებენ მისი კუთვნილი საცხოვრებელი ბინის დემონტაჟს.
საქმე ეხება ძველ სამტრედიაში (ე.წ. ნახალოვკა) ძველ, ორსართულიან საერთო საცხოვრებელ სახლს, რომელსაც მხოლოდ პირობითად შეიძლება ეწოდოს საცხოვრებელი, რადგან სახლი არის ამორტიზებული, ნახევრად დაშლილი, არ აქვს ტუალეტი, აბაზანა და სამზარეულო. ლორიტამ რამდენიმე წლის წინ შეიძინა ბინა აღნიშნულ შენობაში და ნელ-ნელა დაიწყო მისი რემონტი, ახლა კი აღმოჩნდა რომ მის მიერ მოშენებული 7 (შვიდი) კვადრატული მეტრი არის უკანონო და ექვემდებარება დემონტაჟს, ყველაფერ ამას კი ზედამხედველობის სამსახურის მიერ ამოწერილი 4000 (ოთხი ათასი) ლარიანი ჯარიმაც ზედ დაერთო.
ასე ბოლომდე გაიწირა ადამიანი და არავის აინტერესებს რა შეიძლება მოჰყვეს ამ სადამსჯელო ოპერაციას, რამდენად გაუძლებს ადამიანის გული, ნერვები და ფინანსები ასეთ უსამართლობას, დამცირებას და ბანკის ვალებს!..
და ბოლოს, ადგილობრივი ჩინოვნიკების გასაგონად, სამტრედიას ჰყავს ლორიტა ჯორჯიკია და ამ ქალაქმა უნდა შეძლოს, უნდა ისწავლოს, უნდა მოახერხოს მსგავსი ადამიანების დაფასება, მათი ნიჭის და შესაძლებლობების შეფასება, მათი იდეების და მოქალაქეობრივი პოზიციონირების რეალობად ქცევა. მხოლოდ ასეთ შემთხვევაში დაეკარგება ჩვენ ქალაქს დოგვილად გადაქცევის პერსპექტივა და სწორედ ასეთ ქალაქში ცხოვრება გახდება ყველა ჩვენთაგანისთვის სასურველი, საამაყო და სასიამოვნო”-წერს იმედა გოგავა.
