ნიუ-იორკში ქართველი მხატვარი გარდაიცვალა – ამის შესახებ ინფორმაციას სოციალურ ქსელში ჟურნალისტი ნანული ცხვედიანი ავრცელებს.
“მეგა ტვ” პოსტს უცვლელად გთავაზობთ:
“ნიუ -იორკში გარდაიცვალა ამერიკის შეერთებულ შტატებში მოღვაწე ქართველი მხატვარი გულნარა წიკლაური!
მოულოდნელად წავიდა ჩვენი გულიკო – უნიჭიერესი შემოქმედი, რომელსაც 20 წლის წინათ დატოვებულ სამშობლოზე ფიქრი არასდროს შეუწყვეტია. ფეისბუკზე მისი პოსტები მუდამ გამოხატავდა შორს დარჩენილი ქვეყნის, ქართული საზოგადოებისადმი გულნარა წიკლაურის მგრძნობიარე და არაორდინარულ დამოკიდებულებას. ზოგჯერ ხისტად და მკაცრად, ზოგჯერ – გულისტკივილით და სევდით,ზოგჯერ – სიხარულით და მონატრებით, მაგრამ ყოველთვის – უდიდესი სიყვარულით, ის მუდამ იყო თავის მშობლიურ ქალაქში, თავის ქვეყანაში და გულწრფელად გამოხატავდა მოქალაქეობრივ სათქმელს.
მის ტილოებს ამერიკაში დიდი აღიარება ჰქონდა, მის გამოფენებს არ აკლდა პროფესიონალთა უმაღლესი შეფასებები, ნაკლებად იცნობდა მხოლოდ სამშობლო. ვერ მოასწრო გულიკომ ქუთაისში დაბრუნება, ახალ ბინაში შესახლება, მშობლიურ ფესვებთან მიახლება…
აღარ დადგა მისი “ხვალ”, აღარ გამოჩნდა მისი “შინ”… – წერს ნანული ცხვედიანი
