წვიმა გაყალბების ერთ-ერთი კარგი საწინააღმდეგო ამინდია
წვიმაში “არამოტივირებული ორგანიზებული” ამომრჩეველი ნაკლებად მოდის ან უფრო ძვირად უფასებს მის მაორგანიზებელს მის მობილიზაციას
წვიმაში “გადასატანი ყუთის მიღმა დარჩენილი ხანში შესული ადამიანების” ორგანიზებული მიყვანა მაღალი რისკის შემცველია
წვიმაში პასუხისმგებლიანი, მოტივირებული და გააზრებული არჩევანის მქონე ადამიანები ინდომებენ არჩევნებზე მისვლას.
ამიტომ წვიმა მნიშვნელოვან როლს შეასრულებს ხვალ, ერთი მხრივ გაყალბების შემცირების, ხოლო მეორე მხრივ მოტივირებული ამომრჩევლის სწორი შედეგის ჩვენებით.
მოტივირებული ამომრჩეველი, როგორც წესი, კრიტიკულად განწყობილი ამომრჩეველია, რომელსაც ცვლილებები სურს, რომელსაც გააჩნია პროტესტი და მზადაა ნებისმიერ ამინდში ხმის მიცემით გამოხატოს მისი დამოკიდებულება.
წვიმა გამარჯვების ამინდია!
არ შეგეშინდეთ არც ხვალინდელი და არც მომდევნო დღეების!
არ დაიჯეროთ, რომ “ქართული ოცნება” იმარჯვებს ხვალ. ამას რაციონალური ახსნა აქვს და აი არგუმენტები.
“ქართულმა ოცნებამ” 2020 წლის საპარლამენტო არჩევნებში 48% აიღო. სულ რეგისტრირებული 3 511 853 ამომრჩეველი იყო, პროპორციული საარჩევნო სისტემით ჩატარებულ არჩევნებში მონაწილეობა კი – 1 992 891-მა ამომრჩეველმა მიიღო.
“ქართულმა ოცნებამ” პროპორციული წესით 60 მანდატი მიიღო და დანარჩენი მაჟორიტარებით შეავსო (ახლა მაჟორიტარული წესი აღარაა) და ჯამში + – 84 დეპუტატი ჰყავდა.
ოპოზიციამ, მაშინ ერთიანობაში 60 მდე მანდატი მიიღო. აქედან ზოგმა უარი თქვა საპარლამენტო საქმიანობაზე.
2021 წლის ადგილობრივი თვითმმართველობის არჩევნებში კი “ქართულმა ოცნებამ” 40,39% აჩვენა საერთო მონაცემებით, რაც 8% ნაკლებია ვიდრე საპარალამენტო არჩევნების მაჩვენებელი. დარჩენილი პროცენტები კი პოლიტიკურ ოპოზიციაზე გადანაწილდა + ნაშთი.
2024 წლის 26 ოქტომბრის საპარალამენტო არჩევნები განსხვავებულია როგორც პროცედურით (ტექნოლოგიური) ისე მნიშვნელობით ვიდრე წინარე არჩევნები:
1. კრიტიკული არჩევნებია, რაც მონაწილეობას დაახლოებით 10% მდე მაინც გაზრდის. როგორც წესი ოპოზიციურად განწყობილი ადამიანების ხარჯზე.
2. სრულად პროპორციულია, რაც ნიშნავს, რომ მაჟორიტარების ხარჯზე ვეღარ შეივსება დეპუტატთა რაოდენობა. ანუ მინიმუმ 20 დან 30 მდე დეპუტატი გამოაკლდება უმრავლესობის მოპოვების მსურველ პარტიას. მაჟორიტარული სისტემის მეშვეობით პროპორციული 48% “ქართულმა ოცნებამ” გაზარდა 76% მდე.
3. ახალი ტექნოლოგიის გამოყენებით იქნება ეს არჩევნები, სადაც გაყალბების დახვეწილი გამოცდილება ამ ეტაპზე არ არსებობს, ამიტომ თუ ვინმე გაყალბებას მოინდომებს ამოყობს თავს შარში და იქნება ძალიან ხილული. გაითვალისწინეთ, რომ ადამიანური რესურსის დეფიციტია ყველა საარჩევნო კომისიაში, განსაკუთრებით ცოდნის (გაყალბებას კი განსაკურებული სიფრთხილე და “ცოდნა” ჭირდება, მითუმეტეს გამოუცდელი ტექნოლოგიის პირობებში) და პროფესიონალიზმის თვალსაზრისითაც.
4. “ქართული ოცნება” 12 წელია ხელისუფლებაშია და მოსახლეობას მისით გადაღლილობის მომენტიც აქვს. ეს ხშირად უფრო დიდი გამოწვევაა პარტიისთვის ვიდრე მათი მტკიცება “მშვიდობა გვინდა” :))) ადამიანები არ თვლიან თავს უმადურებად ამ შემთხვევაში და აქ მარტივი ლოგიკა მუშაობს: “სულ ხო მაინც ვერ იქნებიან და ახლა “ცოტა ხანი” დაისვენონ”.
5. ოპოზიცია განსხვავებულია ვიდრე წინა არჩევნების პროცესში. 1. იმიტომ რომ მეტნაკლებად შეძლეს გამსხვილება და განსხვავებულობის წარმოჩენა; 2. არ აყვნენ “ქართული ოცნების” ტრიუკებს; 3. საარჩევნო კამპანიაში აჩვენეს ხალხმრავლობა და ზოგიერთებმა ეფექტური კამპანიაც; 4. ვფიქრობ, ექნებათ ორგანიზებული საარჩევნო პროცესი არჩევნების დღეს.
6. ყველაზე მნიშვნელოვანი მთელ ამ არითმეტიკაში არის ბოლო დროს ხალხმრავალი მიტინგები და მოსახლეობის აშკარა მოთხოვნა “კოალიციურ მთავრობაზე”.
თუ ჩემი ეს არგუმენტები მისაღებია, მაშინ ხვალ მოსალოდნელია შემდეგი:
1. მოსახლეობის მაღალი ჩართულობა. შეიძლება იყოს 60-65% ფარგლებში – რაც მიუნიშნებს, რომ სავარაუდოთ იქნება კოალიციური ან ტექნიკური მთავრობა;
2. “ქართული ოცნება” მიიღებს (წესიერების ფარგლებში 25-32%), ხოლო – 35-38% (აქ მანიპულაციების ვერსიებიც შედის). თუ აიღო 40% მეტი – ნიშნავს რომ დაახლოებით 6% მანიპულაცია იყო, თუ მეტი პროცენტი აიღო, ნიშნავს რომ 10% მეტი მანიპულაცია განახორციელა. ორივე შემთხვევაში გაყალბება იქნება საგრძნობი და ყველასთვის ხილული. მანიპულაციაში ვგულისხმობ, როგორც ხმების პირდაპირ გაყალბებას, ისე გადაუწყვეტელი ამომრჩევლის მოსყიდვას არჩევნებზე არ მისვლით, სპეციალური ბარიერების შექმნა ადამიანებისთვის რომ შეამცირონ ხმის მიცემის შესაძლებლობა და სხვა მრავალი ტრიუკი.
3. ოპოზიციის რეიტინგები, ბოლოდროინდელი მოვლენების შემდეგ გაიზარდა და არა შემცირდა. მაჟორიტარული სისტემის გარეშე, 2020 წლის მსგავსადაც კი “ქართულმა ოცნებამ” 48% რომ აიღოს 60 მდე მანდატს მიიღებს 90 ოპოზიციის მანდატის საპირწონედ.
მაგრამ, 8% კლება 2020 წლის საპარლამენტო და 2021 წლის ადგილობრივი არჩევნების ჩვენებით ამბობს, რომ ნაკლებ სავარაუდოა ახლა მათ ისევ 8% მოემატა ხმები. პირიქით, ვფიქრობ ყველა გრძნობს, რომ რუსული კანონის, დასავლეთთან პირდაპირი დაპირისპირების ფონზე, ვიზა ლიბერალიზაციის გაუქმების და სხვა მათ კიდევ მინიმუმ 6-7% მოაკლდათ (ეს თუნდაც გახარიას პარტიის მზარდ რეიტინგში ჩანს, რომელიც ძირითადად “ქართული ოცნების” ყოფილ ამომრჩეველს აერთიანებს).
ამას დამატებული აქტიური ხმები საზღვარგარეთ, მაღალი სადამკვირვებლო ორგანიზება და უპრეცედენტოთ ფართო მასშტაბის დაკვირვება უბნებზე უბრალო მოქალაქეების, სადამკვირვებლო ორგანიზაციების და სხვა.
ანუ უმრავლესობის მისაღებად მითუმეტეს საკონსტიტუციოსთვის ისეთი მასშტაბური მანიპულაცია უნდა ჩაატარომ, რომლამის ყოველ მეორე ოჯახმა გაიგოს, რომ ამას სჩადიან. ან საკუთარ თავსვე უნდა მოუწყონ რევოლუცია, რაც ბრახაბრუხს უფრო ჰგავს ვიდრე რეალობას. საერთოდ, ბატონ ბიძინას უყვარს “ბლეფზე” თამაში, მაგრამ ახლა სულ სხვა ვითარებაა.
არანაირი რაციონალური და პრაგმატული თვალსაზრისით შანსი ვინმემ ახალი მოწვევის პარლამენტში უბრალო უმრავლესობაც კი მიიღოს არ არის. სურპრიზები შეიძლება მოხდეს. ეს მიღმაა ხილული ამბებისგან, თუმცა ძალიან დაბალია შანსი.
ამიტომ, თამამად მიდით არჩევნებზე. მიდით ისინიც ვისაც არ გადაგიწყვეტიათ ვის აძლევთ ხმას. მიდით და მაინც გააკეთეთ არჩევანი, რადგან ახლა ჩვენ ვირჩევთ ევროპას.
კიდევ ერთხელ და მრავალჯერ!