არქიმანდრიტი დოროთეს [ყურაშვილი] შემდეგ საპატრიარქოში მამა ილია თოლორაიაც დაიბარეს. აქციების მონაწილე სასულიერო პირს ახსნა-განმარტებებს სავარაუდოდ მის მიერ გაკეთებული განცხადებების გამო სთხოვენ. ირკვევა, რომ მასთან გასაუბრება მეუფე შიოს და მეუფე თეოდორეს სურთ.
მამა ილია თოლორაია საპატრიარქოში ხვალ 13:00 საათზეა დაბარებული. სასულიერო პირი იქ მისვლას გეგმავს და ამბობს, რომ მზადაა, ყველა იმ კითხვას გასცეს პასუხი, რომელიც მასთან მიმართებით მაღალ იერარქებს აქვთ.
ამასთან, აღსანიშნავია, რომ მამა ილია თოლორაიას საპატრიარქოში დაბარებამდე, მამა ანდრია ჯაღმაიძემ სოციალურ ქსელში დაწერა, რომ სასულიერო პირს კითხვებზე პასუხები ჰქონდა გასაცემი.
გუშინ დამირეკა მამა მიქაელ ბოტკოველმა და მითხრა, რომ ოთხშაბათს 13:00 საათზე მეუფე შიოს, მეუფე თეოდორეს უნდაშენთან გასაუბრებაო. სავარაუდოდ, დაბარებული ვარ იმაზე, რომ მეუფე შიოზე ვთქვი ეგზარქოსი. მმართველს ნიშნავს თვითინ სიტყვა “ეგზარქოსი”, არის ეპისკოპოსი, უბრალოდ, ეპისკოპოსი, რომელიც რუსეთის მხარეს დგას. ამას მე რატომ ვამბობ? უბრალოდ, მე ჩემს სიტყვებს არ ვიბრუნებ. ეს მე ვთხვი იმიტომ, რომ როდესაც მე დავინახე ქუჩაში ახალგაზრდებს, ჟურნალისტებს, ქალებს, ბიჭებს, მოხუცებს სცემდნენ, ასისხლიანებდნენ და მეუფისგან ერთი სიტყვა არ გამიგია, რომ ნუ აკეთებთ ამას… ვინ იყვნენ ეს ახალგაზრდები, რომლებიც გამოსულები იყვნენ? გამოსულები იყვნენ რუსეთის საწინააღმდეგოდ. ერთი სიტყვა არ გამიგია მეუფისგან, რომ რუსეთი ოკუპანტია და რუსეთი საქართველოს მტერია. სად დგახართ, მეუფევ? რუსეთის მხარეს თუ საქართველოს მხარეს? მე ამაზე პასუხს ვაგებ.
როცა მამა ანდრია ჯაღმაიძემ დაწერა, რომ ასეთი უპასუხისმგებლო განცხადება არცერთ ეპარქიაში არ დარჩებოდაო ისე და ამის გამო პასუხი უნდა აგოსო, მე ვეტყოდი მამა ანდრიას, რომ მისი განცხადება არ იყო უპასუხისმგებლო, როდესაც მამა დოროთეზე თქვა, მოძალადე არისო?, – ამბობს მამა ილია თოლორაია.
ცნობისთვის, საპატრიარქოს გადაწყვეტილების მიხედვით, საქართველოს კათოლიკოს-პატრიარქმა ილია მეორემ გაიზიარა ეპარქიული კომისიის შუამდგომლობა და არქიმანდრიტი დოროთე ყურაშვილი ქვემო ბეთლემის ტაძრის წინამძღვრობიდან გაათავისუფლა.
