ამირან ძოწენიძე – პარტიის “ევროპული საქართველო” მერობის კანდიდატი ქუთაისში
დაბადების თარიღი: 1965 წლის 12 დეკემბერი, ქუთაისი
განათლება:
1982 წელს დაამთავრა ქუთაისის მე-20 საშუალო სკოლა
1994 წელს წარჩინებით (წითელ დიპლომზე) დავამთავრე თბილისის ი.ჯავახიშვილის სახელობის სახელმწიფო უნივერსიტეტის ეკონომიკის ფაკულტეტი.
სამუშაო გამოცდილება
1982-84 და 86-88 წლებში ვმუშაობდი ქუთაისის ელექტრო მექანიკურ ქარხანაში ზეინკლად
1995 წლიდან 2001 წლამდე ვიყავი საქართველოს მეცნიერებათა აკადემიის ეკონომიკის ინსტიტუტის მეცნიერ თანამშრომელი.
1992 წლიდან 2005 წლამდე ვმუშაობდი გაზეთ „მიმომხილველის“ ჟურნალისტად. გაზეთების: „ბიზნეს კურიერი“, „რეზონანსი“ და „ხვალინდელი დღე“ რედაქტორის მოადგილედ. ჟურნალების: „რეზონანს ექსკლუზივი“ და „ევროპა“ რედაქტორად. იმავდროულად ვთანამშრომლობდი საზოგადოებრივი ტელევიზიის „პირველი არხი“ და „პირველი რადიო“-ს სხვადასხვა რედაქციებთან.
2005-2012 წლებში ვიყავი სხვადასხვა კერძო კომპანიის მენეჯმენტში;
2012-2013 წლებში ვიყავი ქუთაისის მერის მოადგილე, ხოლო 2013 წელს იმერეთის გუბერნატორის მოადგილე.
2014-17 წლებში ვიყავი ქუთაისის საკრებულოს წევრი.
2017 წლიდან დღემდე ვხელმძღვანელობ ჩემს მიერ დაფუძნებულ კომპანიას, რომელიც სოფლის მეურნეობის პროდუქციის წარმოებითაა დაკავებული.
განსაკუთრებით ვამაყობ, რომ ბოლო ათ წელზე მეტი, ჩემს ასევე მშობლიურ 31-ე საჯარო სკოლაში (სადაც მეხუთე კლასამდე ვსწავლობდი), ვასწავლი „ეკონომიკა და სახელმწიფოს“ და „ბიზნესის საფუძვლებს“.
https://www.facebook.com/500695566726204/videos/3464005140383350
ქუთაისს ბევრი პრობლემა აქვს, თუმცა მათ შორის უმთავრესი უუფლებობაა. ჩვენ, ქუთაისელებს არავინ გვეკითხება, ვინ უნდა იყოს ქალაქის პოლიციის უფროსი, ქალაქის ფინანსებზე პასუხისმგებელი, ვინ უხელმძღვანელებს და ვის მოვთხოვოთ პასუხი საგანგებო სიტუაციების თუ ხანძრის დროს. არავინ გვეკითხება ჩვენი შვილები რას ისწავლიან და ვინ ასწავლის. ჩვენ იმასაც კი არავინ გვეკითხება, სად რა გზა უნდა დაიგოს. „ყველაფერი ცენტრში წყდება“ და ჩვენ მხოლოდ „ამინდის პროგნოზში“ და „კრიმინალურ ქრონიკებში“ ვახსენდებით, ეს სიტუაცია უნდა დამთავრდეს, ქუთაისელებმა ჩვენი ქალაქის მართვა ჩვენს ხელში უნდა ავიღოთ, ამისთვის:
ქალაქელებმა, მერთან ერთად, თავად უნდა ავირჩიოთ: მერის მოადგილე (ვინც მერს მისი არყოფნის შემთხვევაში შეცვლის) ფინანსების, ინფრასტრუქტურის, საგანგებო სამსახურის და ა.შ. ხელმძღვანელები, ქალაქის პოლიციის უფროსი (შერიფი), სასკოლო ოლქის (რესურსცენტრის) ხელმძღვანელი და ა.შ.
ყველა ქალაქს მისი ფუნქცია ასულდგმულებს, ქუთაისი არც საპორტო ქალაქია და არც სავაჭრო გზაზე მდებარეობს, ის წარმატებას ყოველთვის აღწევდა, როგორც პოლიტიკური ცენტრი. ასე იყო: აფხაზეთის, გაერთიანებული სამეფოს, დასავლეთ საქართველოს თუ იმერეთის სატახტო ქალაქობისას და რუსეთის იმპერიის გუბერნიის ცენტრობისას. როგორც კი ამ სტატუსს ვკარგავდით, ვკარგავდით განვითარების პერსპექტივასაც. ამიტომ ქუთაისს უნდა დაუბრუნდეს პარლამენტი სრულად, რომელიც ყველა სიკეთესთან ერთად ქალაქს 2 ათასამდე ახალ სამუშაო ადგილს და 60 მილიონ ლარზე მეტ დამატებით ფულს მოუტანს.
აეროპორტი, ქალაქის გამდიდრების უდიდესი წყარო, სრულად უნდა ამოქმედდეს. სასწრაფოდ უნდა დავაბრუნოთ ვიზეარის (WIZZ AIR) ბაზა და ასევე შემოვიყვანოთ დაბალბიუჯეტიანი ავიაკომპანია რაინეარი (RYANAIR). ამ შემთხვევაში სავსებით რეალურია 2,5 მილიონ ვიზიტორამდე ასვლა, რაც მილიონზე მეტ ტურისტს და ქუთაისელებისთვის დამატებით სამუშაო ადგილებსა და შემოსავალს ნიშნავს.
ქუთაისს სჭირდება პროდუქციის გასაღების ახალი ბაზრების მოძიება, რათა ქალაქში შემოვიდეს დოვლათი და შეიქმნას მეტი სამუშაო ადგილი.
ამისთვის, ჩვენი გეგმით, ქუთაისის აეროპორტს დაემატება სატვირთო ტერმინალი, რომელიც თვითმფრინავების მეშვეობით ავიაკონტეინერებით გადაზიდავს აქ წარმოებულ პროდუქციას ევროპაში.
ქალაქისთვის დღემდე პრობლემაა მეორადი საზოგადოებრივი ტრანსპორტი, კერძო ფირმებთან თანამშრომლობით ამ პრობლემის მოგვარებას შევძლებ.
ამას გარდა: ბაღის ასაკის ყველა ბავშვზე წელიწადში 1000 ლარიან ვაუჩერს გავცემთ. რითაც მშობელს საშუალება ექნება თავად აირჩიოს ბაღი, მათ შორის კერძოც.
დავასრულებ ქუთაისის „ტორპედოს“ გარშემო შექმნილ გაუგებრობას და მას სრულად გადავცემ მის ახლანდელ კერძო ინვესტორს.
ქუთაისის მერიასა და დაქვემდებარებულ სამსახურებში რამდენიმე ათასი ადამიანი მუშაობს. სამწუხაროდ, ნიჭისა და განათლების ნაცვლად, იქ ფასობს ნაცნობობა და პარტიული კუთვნილება, რაც საბოლოოდ განაპირობებს არაპროფესიონალიზმს და კორუფციას, მე არ ვაპირებ ამას შევეგუო. გადასახადის გადამხდელების ფული ქალაქელებს უნდა ხმარდებოდეს და მათი დაქირავებული ადამიანები ნათესაობით კი არა, პიროვნული უნარ-ჩვევევებით უნდა შეირჩეს.
