ალკოჰოლის მოხმარება ევროპაში კიბოს გამომწვევ ერთ-ერთ მთავარ მიზეზად დასახელდა, ამის შესახებ ჯანდაცვის მსოფლიო ორგანიზაციის კიბოს კვლევის სააგენტოს ახალ ანგარიშში ვკითხულობთ.
ექსპერტების თქმით, ალკოჰოლის მოხმარების შეზღუდვის მიზნით მთავრობის უფრო მკაცრი პოლიტიკა ყოველწლიურად ათასობით კიბოს შემთხვევასა და სიკვდილს თავიდან აგვაცილებს.
მხოლოდ ევროკავშირში, მსოფლიოში ალკოჰოლის ყველაზე მაღალი მოხმარების მქონე სუბრეგიონში, 2020 წელს ალკოჰოლმა კიბოს 111 000-ზე მეტი ახალი შემთხვევა გამოიწვია
მსოფლიოში ამ რიცხვმა დაახლოებით 741 000 შემთხვევას მიაღწია, სადაც ახალი კიბოს შემთხვევების თითქმის 70 პროცენტი მამაკაცებზე მოდის.
ჯანმრთელობაზე უარყოფითი შედეგების გარდა, ეკონომიკური ზიანიც მნიშვნელოვანია: ჯანდაცვის მსოფლიო ორგანიზაციის მონაცემებით, ალკოჰოლთან დაკავშირებული კიბოს ნაადრევი სიკვდილიანობით ზიანი 2018 წელს 4.58 მილიარდი ევროს შეადგენს.
როგორ უკავშირდება ალკოჰოლი კიბოს?
IARC-მა ალკოჰოლი პირველად 1988 წელს დააკლასიფიცირა, როგორც კანცეროგენული. კვლევის მიხედვით ალკოჰოლი ზრდის კიბოს სულ მცირე შვიდი სახეობის განვითარების რისკს, მათ შორის პირის ღრუს, ხახის, ხორხის, საყლაპავის, ღვიძლის, მსხვილი ნაწლავის და ქალის სარძევე ჯირკვლის კიბოს.
მკვლევრები თვლიან, რომ ალკოჰოლი კიბოს იწვევს მრავალი მექანიზმით, მათ შორის ჰორმონების დონის შეცვლით, ნაწლავის მიკრობიომის ცვლილებებით და დნმ-ის დაზიანებით ოქსიდაციური სტრესით და მეტაბოლიტით აცეტალდეჰიდით, რომელიც ეთანოლში გვხვდება.
ალკოჰოლის შემცირება ან მისი მოხმარების შეწყვეტა ამცირებს ამ კიბოს განვითარების რისკს.
