ახალციხე – ადიგენის გზაზე, სოფელ ფარეხას ტერიტორიაზე, მომხდარი ავტოსაგზაო შემთხვევის შედეგად გარდაცვლილები და-ძმა არიან. როგორც „ შინაგან საქმეთა სამინისტროში განაცხადეს „მერსედესის“ მარკის ავტომობილი თანმხვედრი მიმართულებით მოძრავ სატვირთოს შეეჯახა.
მსუბუქ ავტომობილში მჯდომი და-ძმა ადგილზე გარდაიცვალა, მათი დედა კი მძიმე დაზიანებებით საავადმყოფოშია გადაყვანილი.
აღნიშნულ ფაქტზე გამოძიება სისხლის სამართლის კოდექსის 276-ე მუხლის მერვე ნაწილით დაიწყო, რაც ავტომობილის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც გამოიწვია 2 ან მეტი ადამიანის სიცოცხლის მოსპობა.
ამ წუთებში, გარდაცვლილების სახლთან შეკრებილი არიან მეზობლები და ნათესავები. გარდაცვლილ და-ძმას სახლში, აბასთუმანში გადაასვენებენ.
საჭესთან 1998 წელს დაბადებული დ.ბ იჯდა. ბიჭი სამხედრო პირი იყო და კონტრაქტიც ახალი გაფორმებული ჰქონდა. ოჯახს მერსედესის მარკის ავტომანქანა ახალი ნაყიდი ჰქონდა.
ავტოსაგზაო შემთხვევას ემსხვერპლა დ.ბ-ს და 1993 წელს დაბადებული მ.ბ.
დედა ნ.გ ამჟამად კლინიკა ,,იმედში“ რჩება. მის გადასაყვანად რეანომობილის მისვლას ელოდებიან.
