ჩვენ ვიცით, რომ ამ შტამს ბევრი მუტაცია აქვს, – ამის შესახებ ჯანდაცვის მსოფლიო ორგანიზაციის კორონავირუსთან ბრძოლის ტექნიკური ჯგუფის ხელმძღვანელმა, მარია ვან კერკხოვემ განაცხადა.
მან კორონავირუსის სამხრეთ აფრიკაში აღმოჩენილ ახალ შტამზე, B.1.1.529-ზე ისაუბრა და აღნიშნა, რომ ორგანიზაცია მის შესახებ ცნობებით შეშფოთებულია და ამ ახალ ვარიანტს იძიებს.
“ჩვენ მის შესახებ საკმარისი ინფორმაცია ჯერ არ გვაქვს. ხელმისაწვდომია მხოლოდ 100-ზე ნაკლები სრული გენეტიკური თანმიმდევრობა. თუმცა ვიცით, რომ ამ შტამს ბევრი მუტაცია აქვს”, – აღნიშნა მარია ვან კერკხოვემ.
მისი თქმით, ვირუსის ევოლუციის ჯგუფი განიხილავს, შეუქმნის თუ არა ეს შტამი ვაქცინაციას საფრთხეს.
”კერძოდ, საუბარი იქნება იმაზე, კლასიფიცირდება თუ არა ეს შტამი შემაშფოთებელ ვარიანტად (VOC) თუ ინტერესის ვარიანტად (VOI). თუ შტამი ამ რომელიმე კატეგორიას მიეკუთვნება, მაშინ ჯანმო მას ბერძნული ანბანის ასოს სახით სახელს მიანიჭებს”, –განაცხადა კერკხოვემ.
ცნობისთვის, ჯანდაცვის მსოფლიო ორგანიზაცია (ჯანმო) დღეს საგანგებო შეხვედრას ატარებს. მონაწილეები კორონავირუსის სამხრეთ აფრიკასა და ბოტსვანაში აღმოჩენილი ახალი შტამის შესახებ ისაუბრებენ, რომელსაც მუტაციის მაღალი მაჩვენებელი აქვს.
COVID-ის ახალი შტამი ბრიტანელმა მეცნიერებმა აღმოაჩინეს. ის წინა შტამებზე უფრო საშიში და ვაქცინებისადმი მდგრადია, თუმცა ჯერჯერობით ფართოდ გავრცელებული არ არის. ექსპერტები თვლიან, რომ COVID-ის ახალი ვარიანტი ბოტსვანაში წარმოიშვა. ამ დროისთვის ამ შტამის 10 შემთხვევა სამ ქვეყანაშია დაფიქსირებული – ბოტსვანაში, სამხრეთ აფრიკასა და ჰონგ-კონგში. ის 32 მუტაციას შეიცავს.
