წინასწარ იმის თქმა, რომ ლარის კურსის გამო შეიძლება ტარიფი გაიზარდოს ან არ გაიზარდოს, არის შეუძლებელი, – ამის შესახებ საქართველოს ენერგეტიკისა და წყალმომარაგების მარეგულირებელი კომისიის თავმჯდომარემ, ირინა მილორავამ განაცხადა.
როგორც მილორავამ აღნიშნა, სამომხმარებლო ტარიფი შედგება სამი კომპონენტისგან: ეს არის განაწილების ტარიფი, ტრანსპორტირების ტარიფი და ბუნებრივი გაზის მიწოდების ფასის ჯამი.
„როდესაც ჩვენ ვსაუბრობთ ლარის კურსზე, მას გავლენა აქვს მხოლოდ მიწოდების ფასზე, ანუ სამომხმარებლო ტარიფის მხოლოდ ერთ კომპონენტზე. ამიტომ იმის თქმა, რომ კურსის გამო შეიძლება ტარიფი გაიზარდოს ან არ გაიზარდოს, წინასწარ შეუძლებელია. მინდა შეგახსენოთ შარშანდელი წელი. შარშან გვქონდა არსებული ცვლილება კურსში და იყო მოლოდინი, რომ სამომხმარებლო ტარიფები გაიზრდებოდა, თუმცა სამომხმარებლო ტარიფი დარჩა უცვლელი და ეს მოხდა იმის ხარჯზე, რომ ბუნებრივი აირის შესყიდვის ფასი შემცირდა, კომპანიებმა უფრო დაბალ ფასად შეისყიდეს ბუნებრივი აირი და ამის საფუძველზე მოხდა კურსით გამოწვეული ეფექტის დაბალანსება. ასე შეიძლება მოხდეს ტარიფების გადახედვის დროსაც. მაგალითად, ბუნებრივი გაზის ფასის შემცირებით, რომელიც ფიქსირებულია დოლარში. ასევე შეიძლება დააბალანსოს იგივე დანარჩენი ორი კომპონენტის გადახედვამ და შემცირებამ. თუ მაგალითად, შემცირდა განაწილების ტარიფი. ბუნებრივია, ამან შეიძლება დააბალანსოს მიწოდების ფასი. მე ეს მაგალითად მოგიყვანეთ. შესაძლებელია შეიცვალოს სხვა შემადგენელი კომპონენტები შემცირების მიმართულებით და ეს დამოკიდებულია, იმაზე თუ რა რაოდენობის ინვესტიცია განახორციელეს კომპანიებმა და აი, ამ სხვა კომპონენტების შემცირების ხარჯზე შესაძლებელია ტარიფი საერთოდაც არ შეიცვალოს“, – განაცხადა ირინა მილორავამ.
1tv.ge
