ძმის მკვლელობისთვის ბრალდებულმა გიორგი წურწუმიამ ქუთაისის ციხეში სავარადუოდ სიცოცხლე თვითმკვლელობით დაასრულა. სასჯელაღსრულების დეპარტამენტი ინფორმაციას ამ ეტაპზე არც უარყოფს და არც ადასტურებს, როგორც მათ ტელეკომპანია “მეგა ტვ”-ს განუცხადეს ისინი საქმეს იკვლევენ.
მამაკაცის თვითმკვლელობის შესახებ ინფორმაცია DayNews-ს საკუთარმა წყარომ ექსკლუზიურად მიაწოდა. მათივე გავრცელებული ინფორმაციით წურწუმიას ოჯახის წევრები და ახლობლები ქუთაისში, შემთხვევის ადგილზე მიემგზავრებიან. მათთვის ჯერჯერობით უცნობია თვითმკვლელობის დეტალები.
ზუგდიდის რაიონულმა სასამართლომ ძმის მკვლელობაში ბრალდებულს აღკვეთი ღონისძიების სახით პატიმრობა გუშინ შეუფარდა. ბრალდებულმა სრულად გაიზიარა პროკურორის შუამდგომდგომლობა და განაცხადა ,,მე არ ვაპირებ თავის გამართლებას. თავს არ დავიცავ,”- აღნიშნა ბრალდებულმა სასამართლო სხდომაზე და უფლებადამცველის ყოლაზე უარი განაცხადა.
28 სექტემბერს, გიორგი წურწუმიამ ძმას ცივი იარაღით მრავლობითი ჭრილობები მიაყენა გულმკერდის არეში და დაჭრილი საავადმყოფოში მიყვანისთანავე გარდაიცვალა. სამართალდამცველებმა ბრალდებული შემთხვევიდან რამდენიმე საათში ზუგდიდის მუნიციპალიტეტის ერთ-ერთ სოფელში დააკავეს.
განზრახ მკვლელობის ფაქტზე გამოძიება სსკ-ის 108-ე მუხლით მიმდინარეობს. დანაშაული 7-დან 15 წლამდე ვადით თავისუფლების აღკვეთას ითვალისწინებს. წინასასამართლო სხდომა 15 ნოემბერს დაინიშნა.
