როგორია საქართველოს ეკონომიკური ზრდა მსოფლიო პანდემიის პირობებში? ამ საკითხზე დღეს პრემიერ მინისტრმა ირაკლი ღარიბაშვილმა მთავრობის სხდომაზე კიდევ ერთხელ გაამახვილა ყურადღება და საზოგადოებას ეკონომიკური განვითარების კონკრეტული ციფრები გააცნო.
„ჩვენ ყველაფერი გავხსენით. რამდენიმე თვეა, ეკონომიკა ძალიან სწრაფი ტემპით იზრდება, გვაქვს უპრეცედენტო ზრდა მთელ მსოფლიოში – 45% აპრილში, 30% მაისის თვეში, 18%-ს ველოდებით ივნისის თვეში და 12%-იანი ზრდა გვაქვს პირველ 6 თვეში, რამაც მოგვცა საშუალება, რომ არც ერთი ლარი სესხი წელს არ აგვიღია.
ჩვენ მილიარდზე მეტით გავზარდეთ წლევანდელი ბიუჯეტი“, – განაცხადა ღარიბაშვილმა.
მისივე განმარტებით, წელს ბიუჯეტი მილიარდით გაიზარდა და ქვეყანას სესხი აღარ აუღია.
ექსპერტები თანხმდებიან, რომ ეკონომიკური განვითარების არსებული ტემპი შეზღუდვების მოხსნას უკავშირდება.
გიორგი ცუცქირიძემ დამატებით კიდევ 4 პუნქტი დაასახელა, რამაც ეკონომიკურ ზრდას ხელი შეუწყო. მისივე შეფასებით, შეზღუდვების ეტაპობრივი მოხსნა მთავრობის მხრიდან გონივრული ქმედება იყო.
„ეკონომიკის განვითარების არსებულ ტემპზე გავლენა პირველ რიგში, სწორმა მენეჯმენტმა გამოიწვია. მეორე, წინა წლებში ძალიან დიდი ბაზისი გვქონდა შექმნილი, რაც უმეტესად, დაკავშირებულია ექსპორტის სტრუქტურასთან.
მესამე ფაქტორი, ეს ეკონომიკის გახსნაა. ჩვენ გახსნა მარტიდან დავიწყეთ და პირველი ეკონომიკური პოზიტივი მარტში იყო. ეტაპობრივად გაიხსნა და ეს ძალიან სწორი და გონივრული გათვლა იყო. თუმცა, ოპონენტების მხრიდან კრიტიკა მაინც მოჰყვა.
შემდეგი ფაქტორი პოზიტიური მოლოდინებია, რომელიც ტურიზმთანაა დაკავშირებული. აღმოჩნდა, რომ წელს ყველაზე დიდი გაცოცხლება ეკონომიკაში ტურიზმს ჰქონდა.
ბიზნესს აქვს პოზიტიური მოლოდინი, სხვანაირად ეკონომიკა ვერ იმუშავებს. ეს სწორედ იმ ღონისძიებებიდან და რეფორმებიდან, რომელიც მთავრობამ განახორციელა“, – განაცხადა ცუცქირიძემ „პრაიმტაიმთან“ საუბრისას.
ამ აზრს იზიარებს მთავრობის მეთაურიც, რომელიც მიიჩნევს, რომ ახალი „ლოკდაუნი“ ქვეყნის ეკონომიკასა და მოქალაქეების კეთილდღეობაზე მძიმედ აისახება.
„ჩვენი ქვეყანა ვეღარ გაუძლებს ახალ ჩაკეტვებს, არც „ლოკდაუნი“, არც შეზღუდვები არ იქნება გამართლებული, უფრო მეტიც, ეს იქნება დამაზიანებელიც ჩვენი ქვეყნის ეკონომიკისთვის,
ეს გამოიწვევს იმას, რომ დამატებით უნდა ავიღოთ ჩვენ რამდენიმე მილიარდი დოლარი, თუ ლარი ვალის სახით, რაც რა თქმა უნდა, შემდეგ გახდება ჩვენი მოქალაქეების გადასახდელი.
ამიტომ, მეგობრებო და ძვირფასო მოქალაქენო, ეს რომ არ განმეორდეს და ამის გაკეთება რომ არ მოგვიწიოს, გთხოვთ ყველას, რომ ჩავიტაროთ ვაქცინაცია, რომელიც არის უსაფრთხო და კიდევ ერთხელ მინდა გავიმეორო,
რომ ჩვენ უნდა დავუჯეროთ მეცნიერებს და არა, „ფეისბუკის“ საშუალებით და სხვადასხვა საშუალებებით გავრცელებულ ათას დეზინფორმაციას და ტყუილს“, – განაცხადა ღარიბაშვილმა.
