საქართველოს პრეზიდენტმა და პრემიერმა 2008 წლის ომის დროს დაღუპული გმირების მემორიალი გვირგვინებით შეამკეს. ჟურნალისტის შეკითხვა “რუსეთი ოკუპანტია?” – სალომე ზურაბიშვილმა უპასუხოდ დატოვა.
„ჩემი აზრი ამ საკითხზე ვთქვი, სანამ გავხდებოდი პრეზიდენტი, დღეს როგორც პრეზიდენტი ჩემი საქმე არ არის, რომ პოლიტიკურ შეფასებები გავაკეთო, თუნდაც, წინა ხელისუფლებაზე,” – აცხადებს საქართველოს პრეზიდენტი აგვისტოს ომზე საუბრისას. მისი შეფასებით, ვინ დაიწყო ომი, ამის განხილვა მხოლოდ ქვეყნის შიდა საკითხია. პრეზიდენტი დარწმუნებულია, რომ მოვა დრო, როცა შეიქმნება შიდა კომისია, სადაც ისტორიკოსები და საზოგადოების სხვა წარმომადგენლები იმსჯელებენ. ზურაბიშვილის აზრით, ის ვინც პროვოკაციულ კითხვებსა და ქმედებებზე მიდის, ქვეყნის მომავლის ისეთივე მტერია, როგორიც გარეშე “მტრები არიან”.
2008 წლის აგვისტოს ომიდან 11 წელი გავიდა. საქართველოს წინააღმდეგ რუსეთის სამხედრო აგრესიის შედეგად დაიღუპა ასობით ადამიანი, 30 ათასამდე ჩვენი მოქალაქე კი საკუთარ სამშობლოში დევნილი გახდა.
