- 21 დეკემბერს ქუთაისში წინა საახალწლო კონცერტზე ნაძვის ხე საპროტესტო აქციის ფონზე აინთო. ადგილზე მომიტინგეებს, 28 ნოემბრის შემდეგ, აქციებზე ძალოვნების მიერ ნაცემი ადამიანების ფოტოები ჰქონდათ მიტანილი.
იმ დღეს, ღონისძიების წამყვანი მსახიობი მაკა შალიკაშვილი იყო, კონცერტზე კი ნინი ქარსელაძე, კახა კუხიანიძე, ქუჩის ბიჭები, თაკო გაჩეჩილაძე მღეროდნენ. შეგახსენებთ, რომ 100-ზე მეტმა მუსიკოსმა უარი განაცხადა სახელმწიფო ღონისძიებებში მონაწილეობაზე.
შალიკაშვილი სოციალურ ქსელში ვრცელ მიმართვას აქვეყნებს და ერთი თვის წინ ჩატარებული კონცერტის სკანდალურ დეტალებს ამხელს, რომელიც ეთერში არ გასულა:
დღეს და გუშინ არ შემიმჩნევია, რომ ბევრი ცნობილი ადამიანი აკეთებს ამას, წავლენ სხვა ქვეყანაში, ჩასხდებიან ავტობუსებში, მეტროებში და იქიდან „ჩექინდებიან“ და უი, თურმე უცხოეთში რა კარგია. მე მათგან განსხვავებით, პირდაპირ ვამბობ, რომ მთელი ცხოვრება საქართველოს მეტროთი, რკინიგზის სადგურით, სამარშრუტო ტაქსებით ვსარგებლობ. არ მეშინია ადამიანების, არ მაქვს მასების შიში. იმიტომ, რომ მე თვითონ ვარ მათი მოყვარული ადამიანი, მათი პატივისმცემელი და ამას ყველა დაადასტურებს ვინც მე მიცნობს. და ძალიან ბევრი მიცნობს.
არ შემშინებია ჩემი მაყურებლის წინაშე გამოსვლა, ჩემი ხალხის წინაშე გამოსვლა, იმიტომ რომ მე ვუძღვებოდი საბავშვო კონცერტს. ყველაზე რთული სიტუაცია იყო ქუთაისში, სადაც ჩემს წინ, ძალიან ბევრი ბავშვი იდგა. იქვე იყო პოლიცია, იმიტომ რომ იყო ადგილზე ის ადამიანებიც იყვნენ, რომლებიც აპროტესტებდნენ და უსტვენდნენ, ბავშვების ზეიმის ჩაშლა უნდოდათ.
- იმ დღეს, მე საბავშვო კონცერტში ვმონაწილეობდი, ვინც მიცნობს, ყველამ იცის, რომ ეს არის საშუალება ჩემთვის საშუალება, ბინის ქირა, ჩემი შვილის გადასახადები, გადავიხადო. ამაზე ვერაფრით ვერ ვიტყოდი უარს, შემედავოს ნებისმიერი ამაში.
ახლა ის, რასაც არავინ ჰყვება, არავინ გადაიღო და გამოაქვეყნა. რა მოხდა იქ – როდესაც ერთ-ერთ მომღერალს სცენაზე ამოუტანეს ნაცემი ადამიანების პლაკატი და გადასცეს. როდესაც მან სიმღერა დაასრულა, მივედი, გამოვართვი, ჩავიხუტე გულში, იმიტომ რომ იქ ბევრი ჩემი ნაცნობი ადამიანი იყო, კოლეგა და ვთქვი ეს სიტყვები:
მე აქ ვდგავარ ტკივილიანი დედა, და, თქვენი კოლეგა, უბრალოდ ადამიანი, ქართველი, რომელსაც ყველაფერი მახსოვს და ამის შეხსენება არ გვჭირდება არავის, მაგრამ დღეს, აი, ამ ბავშვების წინაშე ვართ ჩვენ ვალდებულნი, რომ გამოვიდეთ და ამ ბავშვებს ვაჩუქოთ საახალწლო განწყობა, იმიტომ, რომ მე არ მახსოვს ჩემს ცხოვრებაში არცერთი ეტაპი, როდესაც არ მიჭირდა. როდესაც ჩემი პატარა შვილი მთხოვდა, დაღლილს, საკვებზე და ფულზე მთელი ცხოვრება მოფიქრალს, რომ საიდან რა გადამეხადა და მეყიდა, ხან ვინ რას მაჩუქებდა, ბავშვი მეუბნებოდა, მოდი, დედიკო მეთამაშე, მე ვდგებოდი და ვეთამაშებოდი, მასთან ერთად დავრბოდი, ვმღეროდი, ზღაპრებსაც ვუყვებოდი და ყველაფერს ვუკეთებდი. მას მაშინ არ აინტერესებდა მე ფული მქონდა თუ არა.
ამიტომ, ჩემზე ვერავინ ვერ გაბედავს ვინც მე მიცნობს ვერაფერს, გაბედავს? – მერე უფრო დეტალურად მიიღებს ყველაფერზე პასუხს. მე ჩავიხუტე ჩემი ძვირფასი ბიჭები და მაშინ ვთქვი იქ, რომ ყველა მიყვარხართ, ყველა ქართველები ვართ და ახალ წელსა და შობას ყველა შევხვდეთ საკუთარ ოჯახებში ბედნიერები, გახარებულები და ჯანმრთელები. ეს სამწუხაროდ არავის გადაუღია და არავის უთქვამს, ამიტომ მე მიწევს დღეს ამაზე ლაპარაკი. მე მაამებლად ფეისბუქში არ დავწერ არაფერს, ვიღაცას უნდა ვაამო? – უი, მაკა, ყოჩაღ, შენ გმობ ძალადობას, რა კარგი გოგო ხარ. არა, მე საქმეს ვაკეთებ. მე საქმე გავაკეთე, მაგრამ სამწუხაროდ ეს არავის არ უთქვამს. იძულებული ვარ, რომ მე ვთქვა.
რაც შეეხება ლექსების კითხვას, ყოველთვის და ყველგან წავიკითხავ. არცერთ არხს ტელეკომპანია „იმედის“ გარდა, ჩემთვის არ შემოუთავაზებია ლექსების კითხვა. იგოეთში პატარა რომ ვიყავი, ჩემი ერთადერთი გასართობი ლექსების კითხვა იყო. ოოო, ეს გიჟი მაკა ლექსებს კითხულობს ისევ, დადიოდნენ და ამბობდნენ. ჰო, გიჟი ვარ, მაცალეთ და ვკითხულობ ლექსებს. თუ რომელიმე ტელეკომპანია შემომთავაზებს, აუცილებლად მოვალ და წავიკითხავ. და იმისათვის, რომ მე დღეს კიდევ ერთი შემოსავლის წყარო გამიჩნდა და ლექსებს მაკითხებენ, სკოლებში, ახალგაზრდულ ცენტრებში, მიწვევენ იმ ბავშვებთან შესახვედრად ვისაც ლექსი უყვარს, ზუსტად ამის გამო, დიდი მადლობა ტელეკომპანია „იმედს“, რომელმაც ამის საშუალება მომცა. იქნებოდით სხვები, აუცილებლად თქვენც გახსენებდით. ამიტომ არავის ნიშნის მოგებით არ ველაპარაკები, ძალიან გაბრაზებული ვარ იმაზე, რომ აი, ამის თქმა მომიწია და მე მიწევს საკუთარი თავის დაცვა.” – ამბობს მაკა შალიკაშვილი.
