“ჩვენ ვაპირებთ სამართლებრივ დავას რათა დავიბრუნოთ გუნდი“ – ამის შესახებ ქუთაისის მერმა საფეხბურთო კლუბის ტორპედოს თემაზე კომენტირებისას განაცხადა.
“ჩვენ უკვე დავაყენეთ კლუბის დროებით მმართველი თემურ ჩეჩელაშვილი, რომელიც შეისწავლის არსებულ სიტუაციას, ვიწყებთ სამათლებრივ დავას გუნდის მეპატრონესთან , რათა საბოლოო ჯამში მოვაცილოთ გუნდს არსებული პრობლემები.” – ამბობს გიორგი ჭიღვარია.
კითხვაზე კი თუ ვინ დააფინანსებს გუნდს ქუთაისის მერის განმარტებით ისინი კანონის მიხედვით კერძო ინვესტორის მოძიების პროცესში არიან.
ზაალ ჩაჩავას კლუბში პრობლემები მას შემდეგ შეექმნა, რაც მან ფეხბურთელებს რამდენიმე თვის ანაზღაურება არ გადაუხადა. ფინანსური პრობლემების გამო „ტორპედო“ მიმდინარე წლის ზაფხულში 12-მა წამყვანმა ფეხბურთელმა დატოვა.
ჩაჩავას კლუბიდან წასვლას ითხოვდნენ ფანკლუბის წევრები.
ზაალ ჩაჩავამ პრობლემების მოგვარების პირობა რამდენჯერმე დადო. იგი იმედს ჩინელ ინვესტორთა ჯგუფზე ამყარებდა, თუმცა, საბოლოოდ თანამშრომლობა არ შედგა.
ორი წლის შემდეგ „ტორპედო“ კვლავ ინვესტორის გარეშე დარჩა. ქუთაისის მერია კლუბს ვეღარ დააფინანსებს, რადგან მასზე ზრუნვა „ფეხბურთის განვითარების ფონდს“ ევალება, რომელიც კლუბს წელიწადში 800 000 ლარით აფინანსებს, რაც რეალურად მხოლოდ მისი შენახვის ხარჯებია. რაც შეეხება ახალ ინვესტორს, ქუთაისის მერიაში არ საუბრობენ იმაზე, არის თუ არა ვინმე დაინტერესებული „ტორპედოში“ ინვესტიციის ჩადებით.
