საქართველოში დაბადებისას სქესთა რაოდენობრივი თანაფარდობის კლებადი ტენდენციის მიუხედავად, ვაჟისადმი უპირატესობის მინიჭების პრაქტიკა კვლავ რჩება,- აღნიშნულის შესახებ გაეროს მოსახლეობის ფონდის საქართველოს ოფისისა და თსუ-ს ეკონომიკის საერთაშორისო სკოლის (ISET) კვლევის „სოციალური და ეკონომიკური პოლიტიკის გავლენა ვაჟისათვის უპირატესობის მინიჭებასა და გენდერული ნიშნით სქესის შერჩევის საზიანი პრაქტიკაზე საქართველოში” შედეგების კვლევაშია ნათქვამი.
აღნიშნული კვლევისას გამოიკითხა ოთხი რეგიონი: კახეთი, ქვემო ქართლი, სამცხე-ჯავახეთი და სამეგრელო-ზემო სვანეთი.
როგორც კვლევის შედეგებშია აღნიშნული, სქესის შერჩევის პრაქტიკა ადრე უფრო ფართოდ იყო გავრცელებული, ახლა კი შემცირებულია, თუმცა რეგიონების მიხედვით შედეგები მაინც განსხვავდება. ქვემო ქართლსა და სამცხე-ჯავახეთში გენდერული ნიშნით სქესის შერჩევას საზიანო პრაქტიკად არ აღიქვამენ და ხაზს უსვამენ გვარის გაგრძელებისათვის ვაჟის გაჩენის მნიშვნელობას. კახეთსა და სამეგრელო-ზემო სვანეთში კი, გამოვლინდა უარყოფითი დამოკიდებულება გენდერული ნიშნით შერჩევის პრაქტიკის მიმართ.
გაეროს მოსახლეობის ფონდის ოფისის ხელმძღვანელის, ლელა ბაქრაძის განცხადებით, 2005 წლიდან შეიმჩნევა ვაჟებისადმი უპირატესობის მინიჭების კლების ტენდენცია.
„საქართველოში 90-იანი წლების დასაწყისიდან დაირღვა დაბადებისას სქესთაშორისი ბალანსი, გაცილებით უფრო მეტი ვაჟი იბადებოდა, ვიდრე ბუნებრივად უნდა დაბადებულიყო და შესაბამისად ნაკლები გოგონა, რაც გარკვეულწილად იწვევს მოსახლეობის დემოგრაფიულ-სტრუქტურულ ცვილებებს. დღეისათვის ძალიან კარგადაა ცნობილი, რამ განაპირობა ამ პრაქტიკის აღმოცენება. ასევე, დადგენილია,რომ 90-იანი წლების დასაწყისიდან 2005 წლამდე ეს გადახრა იზრდებოდა და 2005 წლიდან შეიმჩნევა კლების და გამოსწორების ტენდენცია. ამ კვლევის მიზანი იყო რამ გამოიწვია, რა არის ის შესაძლო ფაქტორები, რაც გავლენას ახდენს დადებით ტენდენციაზე საქართველოში, ვინაიდან საქართველოს მაგალითი იყოს სანიმუშო იმ ქვეყნებისათვის, სადაც ეს პრაქტიკა გავრცელებულია და ეს ფენომენი არსებობს. კვლევის შედეგები არის ძალიან საინტერესო. გამოიკვეთა, რომ ქალთა ეკონომიკურმა გაძლიერებამ და ქალთა გაზრდილმა დასაქმებამ შეიძლება ძალიან დადებითი გავლენა იქონიოს სქესთა შორის დარღვეული ბალანსის გამოსწორებაზე, ვინაიდან ეს აძლიერებს ქალთა დამოუკიდებლობას. ასევე, ნათელია, მოსახლეობის ცნობიერების ამაღლება ვაჟისადმი უპირატესობის მინიჭების საზიანო პრაქტიკის შესახებ. დადებითი ცვლილებები გენდერული ნორმების თვალსაზრისით დადებითი გავლენის მომხდენი იქნება სქესთა შორის ბალანსის აღდგენაზე, ვინაიდან ეს ყველაფერი უწყობს ხელს გენდერული თანასწორობის გაძლიერებას”,- განაცხადა ლელა ბაქრაძემ.
კვლევის რეკომენდაციების ნაწილში კი აღნიშნულია, რომ ვაჟისადმი უპირატესობის მინიჭების არსებული პრაქტიკის აღმოსაფხვრელად, საჭიროა ჰოლისტური მიდგომის გამოყენება, სოციალური, ეკომონიკური და კულტურული განზომილებების გათვალისწინებით. რეკომენდაციის თანახმად, არსებული პრაქტიკის დასაძლევად, ძირითადი მიმართულება უნდა ეფუძნებოდეს სიღარიბის შემცირებას, გენდერული თანასწორობის ხელშეწყობას და ქალების გაძლიერებას.
