ქალს, ერთ-ერთ კერძო კომპანიაში მუშაობის პერიოდში, ხელმძღვანელი პირი სექსუალურად ავიწროებდა, რის გამოც მოსარჩელე იძულებული გახდა, დაეტოვებინა სამსახური – ამის შესახებ ინფორმაციას ორგანიზაცია “პარტნიორობა ადამიანის უფლებებისთვის” ავრცელებს.
მათივე ცნობით კომპანია ქალის ინტერესების დასაცავად სახალხო დამცველსა და სასამართლოს მიმართა.
“საქართველოს სახალხო დამცველმა მნიშვნელოვნად მიიჩნია აღნიშნულ საქმეზე სასამართლოს მეგობრის მოსაზრების წარდგენა, ვინაიდან, დისკრიმინაციის ერთ-ერთი ფორმა – სექსუალური შევიწროება დღეს საქართველოში არსებითი გამოწვევაა. ერთი მხრივ, ახალია საქართველოს საკანონმდებლო ბაზა, მეორე მხრივ კი, მწირია სასამართლოს პრაქტიკა, რამაც შესაძლოა გაართულოს საქმის განხილვა. ამასთან, სექსუალური შევიწროების დადგენის სამართლებრივი ტესტი განსხვავებულია პირდაპირი და ირიბი დისკრიმინაციის გამოსავლენი ტესტებისგან.
საქართველოს კანონმდებლობისა და საერთაშორისო ინსტიტუტების მიერ დადგენილი სტანდარტების საფუძველზე, სახალხო დამცველმა ყურადღება გაამახვილა სექსუალური შევიწროების ცნების, ფაქტის გამოვლენის ტესტის, მათ შორის, ლეგიტიმურ მიზანთან და შესადარებელ სუბიექტთან დაკავშირებულ სპეციფიურ საკითხებზე და მტკიცების ტვირთის გადანაწილების სტანდარტზე.” – ნათქვამია სახალხო დამცველის მიერ გავრცელებულ ინფორმაციაში.
