ცხინვალის საოკუპაციო რეჟიმის ინფორმაციისა და პრესის ე.წ სახელმწიფო კომიტეტის ხელმძღვანელი მარია კოტაევა ე.წ საზღვარზე შექმნილ სიტუაციას ბრიფინგთ გამოეხმაურა და მოსახლეობაში არსებული პანიკის შესახებ ისაუბრა:
„შეშინებულები არიან არამხოლოდ უისტას [წნელისი] მოსახლეები, არამედ ხმები და პანიკა მთელ ცხინვალში გავრცელდა კონფლიქტის შესაძლო ესკალაციის თაობაზე. ადამიანები ერთმანეთს ურეკავენ და ეკითხებიან: არის თუ არა ბავშვების ევაკუირების აუცილებლობა. არანაირი ომი არ იქნება, საქართველო სამხრეთ ოსეთს თავს არ დაესხმება. გამორიცხულია. დღევანდელ საქართველოში აფხაზეთისა და ცხინვალის დაბრუნების ოცნება არსებობს, მაგრამ სააკაშვილის ნაბიჯებს არავინ გაიმეორებს. არანაირი ომი არ იქნება – საქართველო სამხრეთ ოსეთს თავს ვეღარ დაესხმება. ჩვენი საზღვრები რუსეთის ფედერაციასთან დადებული სერიოზული შეთანხმების ფარგლებშია დაცული. რომლის თანახმადაც სამხრეთ ოსეთის წინააღმდეგ აგრესია შეფასდება როგორც აგრესია რუსი სამხედროების წინააღმდეგ, რომლებიც აქ არიან განთავსებულნი.“- განაცხადა კოტაევამ.
კოტაევამ ე.წ საზღვართან გავითარებული მოვლენები საქართველოს ხელისუფლებაში ცვლილების შესაძლებლობას დაუკავშირა:
„საქართველოში ახლა პოლიტიკურ ელიტებს შორის დაპირისპირებაა. როგორც კი მათ შიდა პრობლემები ეწყებათ, ხელისუფლება ცდილობს მოსახლეობის ყურადღება საგარეო საკითხებს მიაპყროს. ამით აიხსნება ყველაფერი.“- აღნიშნა კოტაევამ.
კოტაევამ საქართველოს პრეზიდენტზეც ისაუბრა და აღნიშნა, რომ იგი თავის დაპირებებში არათანმიმდევრულია:
„მას შინაგანი სწრაფვა აქვს, რომ სამხრეთ ოსეთი და აფხაზეთი დაიბრუნოს, რადგან მისი ბაბუა მუშაობდა მენშევიკების მთავრობაში და თავისი წვლილი შეიტანა ოსების გენოციდში. ამავე დროს, ის პარალელურად ცდილობს რუსეთთან კავშირების დამყარებას. საქართველო -სრულიად არასაიმედო პარტნიორია საერთაშორისო არენაზე.“- განაცხადა კოტაევამ.
