საქართველოში 2023 წლის იანვარ-ივნისში ცოცხლად დაბადებულთა რიცხოვნობამ 19 431 ბავშვი შეადგინა. ამის შესახებ ინფორმაციას სტატისტიკის ეროვნული სამსახური ავრცელებს.
მათივე მონაცემებით, ამავე პერიოდში ქვეყანაში გარდაიცვალა 21 944 ადამიანი.
„2023 წლის პირველ ნახევარში ბუნებრივი მატება (სხვაობა ცოცხლად დაბადებულთა და გარდაცვლილთა რიცხოვნობას შორის) -2 513 კაცით განისაზღვრა. ბუნებრივი მატების დადებითი მაჩვენებელი დაფიქსირდა თბილისში (340), აჭარის ავტონომიურ რესპუბლიკასა (870) და ქვემო ქართლის რეგიონში (145).
2023 წლის პირველ 6 თვეში რეგისტრირებულია ქორწინების 10 366 და განქორწინების 6 828 შემთხვევა,“- ნათქვამია საქსტატის ინფორმაციაში.
საქსტატის მონაცემებით იმერეთში 2023 წლის იანვარ-ივნისში ცოცხლად დაბადებულთა რიცხოვნობამ 2 396 ბავშვი შეადგინა. მათივე მონაცემებით, ამავე პერიოდში იმერეთში 3 683 ადამიანი გარდაიცვალა.
მათივე ცნობით 2023 წლის პირველ 6 თვეში იმერეთში რეგისტრირებულია ქორწინების 1 614 და განქორწინების 1 182 შემთხვევა.
