ქუთაისური საწარმო „სამკერვალო კომპანია იმერი“ მსოფლიო ბრენდის M&S ოფიციალური მიმწოდებელი გახდა.
მან წარმატებით გაიარა დიდი ბრიტანეთის უმსხვილესი ტანსაცმლის მწარმოებლის, მსოფლიო ბრენდის Marks & Spencer აუდიტი და ოფიციალური მიმწოდებელი გახდა.
როგორც სააგენტო „აწარმოე საქართველოდან“ იუწყებიან, კომპანიის მიერ შეკერილი ტანსაცმელი სხვადასხვა ქვეყნაში, ცნობილი ბრენდის “M&S” მაღაზიებში, იარლიყით Made in Georgia (დამზადებულია საქართველოში) გაიყიდება.
როგორც “სამკერვალო კომპანია იმერ”-ში აცხადებენ ახალ პარტნიორებთან მუშაობისთვის ემზადებიან:
“იმერმა წარმატებით გაიარა Marks & Spencer -ის, ბრიტანეთის ყველაზე უმსხვილესი ტანსაცმლის მწარმოებლისა და მსოფლიო ბრენდის აუდიტი და უკვე თამამად შეგვიძლია განვაცხადოთ ჩვენი პარტნიორობის დასაწყისის შესახებ! გაწეული უზარმაზარი შრომისა და მხარდაჭერისათვის უდიდესი მადლობა იმერის მთელს გუნდს და BTMtextile -ს, რომელთა გარეშეც არ დადგებოდა ეს წარმატებული შედეგი! სულ მალე კი იმერის გულშემატკივრებს კვლავ გაგახარებთ კიდევ ერთი ევროპული პარტნიორით, რომელიც არანაკლებ მნიშვნელოვანია იმერის შემდგომი წარმატებისა და წინსვლისათვის.” – აცხადებენ საწარმოში.
პროგრამის „აწარმოე საქართველოში“ ინდუსტრიული მიმართულების ფარგლებში, კომპანიამ ქ. ქუთაისში, ახალი საწარმოო სიმძლავრეების ამოქმედება შეძლო, რომლის შედეგადაც გაიზარდა წარმოებული პროდუქციის ასორტიმენტი და რაოდენობა. საწარმოში ამჟამად დასაქმებულია 400-მდე ადამიანი.
შპს „სამკერვალო კომპანია იმერი“ საქართველოს ეკონომიკისა და მდგრადი განვითარების სამინისტროს პროგრამის „აწარმოე საქართველოში“ ფარგლებში, ფინანსური, მხარდაჭერით ისარგებლა, რაც იმას ნიშნავს, რომ პირველი 2 წლის განმავლობაში სესხის პროცენტის თანადაფინანსებას სსიპ „აწარმოე საქართველოში“ ახორციელებდა. პროექტის ინვესტიციის ჯამური მოცულობა 800 ათას ლარზე მეტს შეადგენს.
