ქუთაისში აგვისტოდან მიმდინარე 32 ქუჩის რეაბილიტაცია გაზაფხულზე დასრულდება. ამის შესახებ ინფორმაციას საავტომობილო გზების დეპარტამენტი ავრცელებს.
როგორც საავტომობილო გზების ტეპარტამენტში აცხადებენ, ზოგიერთი მედიასაშუალებით ვრცელდება გადაუმოწმებელი და მცდარი ინფორმაცია ქუთაისის ქუჩების რეაბილიტაციასთან დაკავშირებით.
„საავტომობილო გზების დეპარტამენტმა ქუთაისის 32 ქუჩის რეაბილიტაცია აგვისტოდან დაიწყო, მათ შორის 2 ცენტრალური – აღმაშენებლისა და წერეთლის ქუჩების სრული რეაბილიტაცია 2020 წლის სექტემბრში დაიწყო. სამუშაოები 2021 წლის გაზაფხულზე დასრულდება. ქუჩებზე, საგზაო ინფრასტრუქტურასთან ერთად, სრულად მოწესრიგდება სანიაღვრე სისტემები. ამ დროისთვის რეაბილიტაცია უკვე ჩაუტარდა 10 ქუჩას. ქუთაისის ქუჩების რეაბილიტაციის ფარგლებში, დაიგება ასფალტ-ბეტონის საფარი, რეაბილიტირდება ხელოვნური ნაგებობები, მოეწყობა წყალგამტარი მილები, ბორდიურები, ტროტუარები და საგზაო ნიშნები. 29 სარეაბილიტაციო ქუჩის საერთო სიგრძე 10 კმ-ზე მეტია. პროექტის დასრულების შემდეგ, უსაფრთხო და კომფორტული გახდება ქუთაისის ქუჩებში გადაადგილება. საქართველოს საავტომობილო გზების დეპარტამენტი აქტიურად თანამშრომლობს მედიასთან და ინფორმაციის დაზუსტების მიზნით, მუდმივად მზად არის უპასუხოს შეკითხვებს”,- აღნიშნულია გავრცელებულ ინფორმაციაში.
ცნობისთვის დღეს პარტიის “თავისუფალი საქართველო” იმერეთის ბიუროს ხელმძღვანელმა გოგი წულაია წერეთლის გამზირზე აქციოა პერფორმანსი გამართა. მან სარეაბილიტაციო სამუშაოებს, რომელიც მისი თქმით 3 წელია გრძელდება ტორტი მიართვა და დაბადების დღე მიულოცა.
