NFT-ების სამყაროში ბევრი საინტერესო რამ ხდება და რამდენიმე დღის წინ კიდევ ერთი საინტერესო ამბავი გავრცელდა. 12 წლის ბიჭმა პიქსელირებული, უშინაარსო, პატარა ვეშაპები კრიპტო ენთუზიასტს მიჰყიდა – ინფორმაციას on.ge ავრცელებს.
ბენიამინ აჰმედმა CNBC-სთან საუბარში თქვა, რომ მას მოსწონს ბლოკჩეინისა და NFT-ების კონცეპტი. Minecraft-ისნაირ თამაშებში გატარებული დიდი დროისა და NFT-ების შემქმნელებთან საუბრის შემდეგ მას თავისი კოლექციის შექმნაც მოუნდა. სწორედ ასე გამოიმუშავა მან დაახლოებით 400 000 დოლარი. მისი NFT-ების კოლექცია ერთ ღამეში გაიყიდა და 12 წლის ბიჭის ციფრულ საფულეზე უკვე ნახევარ მილიონ დოლარამდე ღირებულების ეთერიუმი იყრის თავს.
აჰმედმა წარმატებას ფაქტობრივად ერთ ღამეში მიაღწია. მისი 3 350 NFT-სგან შემდგარი კოლეცქია, რომელსაც “უცნაური ვეშაპები” უწოდა, უსწრაფესად ამოიყიდა. თითოეული “ნახატი” პიქსელირებული ვეშაპია და არაფერი მეტი.
თუმცა, კოლექციის სიმარტივეს მყიდველები არ დაუბრკოლებია. CNBC-ის თქმით, ყველა ვეშაპი 9 საათში გაყიდული იყო. აჰმედმა ამ პროექტზე ჯამში 300 დოლარი დახარჯა და 80-მდე ეთერიუმი გამოიმუშავა, რაც 250 000 დოლარის ექვივალენტია, თუმცა კოლექციის გაყიდვის შემდეგ, ახალმა მფლობელებმა ვეშაპების გადაყიდვაც მოინდომეს, საიდანაც აჰმედს წილი მუდმივად ხვდება, ამას NFT-ის პრინციპი ითვალისწინებს. ივლისის შემდეგ, სწორედ გადაყიდვების შედეგად, აჰმედს დამატებით კიდევ 30 ეთერიუმი დაუგროვდა, რაც დაახლოებით 94 000 დოლარის ექვივალენტია.
CNBC-ის გათვლებით, თვის ბოლოსკენ აჰმედს უკვე 400 000 დოლარის ეთერიუმი ექნება და მისი თქმით, ის ფულის განაღდებას არ გეგმავს.
“მე ვაპირებ შევინახო ეთერიუმი და არ ვგეგმავ მის ქაღალდის ფულზე გადაცვლას”, — ამბობს აჰმედი CNBC-სთან საუბრისას.
აჰმედი თვლის, რომ მომავალში, შესაძლოა, საბანკო ანგარიშები აღარავის ჰქონდეს და საჭირო მხოლოდ ეთერიუმის საფულისა და მისამათის ქონა იყოს.
On.ge
