“ნაციონალური მოძრაობის” ლიდერის ნიკა მელიას დაკავებას პოლიტიკოსები ეხმაურებიან.
„ბრძოლა პატიმრობით არ მთავრდება, პატიმრობით ბრძოლა იწყება. საქართველოში, 23 თებერვალს, გაფორმდა დიქტატურა. საბჭოთა არმიის დღეს ბიძინა ივანიშვილმა საბჭოთა დიქტატურა დაამყარა. ჩვენ თავისუფლებისმოყვარე ხალხი, ამას არ შევეგუებით. სისხლის უკანასკნელ წვეთამდე ვიბძოლებთ! უკომპრომისო ბრძოლა იქნება“,- აცხადებს გიგი უგულავა.
„ვერ შეგვაშინებენ, რამდენს დაგვაპატიმრებენ? ვაგრძელებთ ბრძოლას ჩვენი სამშობლოსთვის, რომელიც გვტკივა“, – ამის შესახებ „ნაციონალური მოძრაობის“ წევრმა, ხატია დეკანოიძე
„100 წლის წინანდელი 23 თებერვლის მემკვიდრეები არიან, სამწუხაროდ. თქვენ ნახეთ, რომ მხუთავი გაზი გაუშვეთ ამ დახურულ ოთახში. აქ იყვნენ ქალები, ახალგაზრდები და საშინელი მდგომარეობა იყო. მე არ ვიცი, რა ეგონათ, რას ელოდებოდნენ აქ. მათ გაიფორმეს სამუდამო სახელად „გავრილოვები“ და 23 თებერვლის „გმირები“, – განაცხადა ფიქრია ჩიხრაძემ.
„ძალიან დიდი ხნის განმავლობაში, ადამიანები ითხოვდნენ სასწრაფოს და არანაირი რეაგირება არ იყო, იყო ის სისასტიკე, რომელიც დაგვიანონსა ღარიბაშილის ხელით ბიძინა ივანიშვილმა. ჩვენი პოზიცია რჩება უცვლელი, ჩვენ ვართ ერთიანები, მშვიდები, პრინციპულები და ვაგრძელებთ დაუმორჩილებლობას. დღეს, კანცელარიასთან, 15:00 საათზე, ველოდებით ყველას და ყველა მოქალაქე, ვისთვისაც ძვირფასია ის ბრძოლა თავისუფლებისთვის, რომელსაც თავს ბიძინა ივანიშვილი ესხმის, ყველას კანცელარიასთან ველოდებით“, – განაცხადა ელენე ხოშტარიამ.
“ სასამართლო, ქვეყანა ერთი კაცის მიერაა მართული. უნდა დამთავრდეს ეს ყველაფერი! ამ ქვეყანას ასე განვითარება არ უწერია! 4 კილომეტრი ვიარე, იმიტომ რომ გადაკეტილია მთელი ქალაქი, იმის გამო კი არა, რომ წარსულზე ვილაპარაკო. ხალხო, მომავალში გაიხედეთ, მომავალზე ილაპარაკე, თქვენს შვილებზე იფიქრეთ! შვილებს დემოკრატიისა და თავისუფლების გარეშე მომავალი არ აქვთ“, – განაცხადა მამუკა ხაზარაძემ.
„ჩვენი ვალია, რომ ახლა მივცეთ რეაქცია, წინააღმდეგ შემთხვევაში, ჩვენზე უფრო ნაკლებად სახიფათო მდგომარეობაში მყოფი ქვეყნები ჩავარდნილან დიდი ხნით ავტორიტარიზმის ჭაობში, ჩვენ არ გვაქვს უფლება, ხელიდან გავუშვათ თავისუფლების დაცვის შანსი, ამიტომ არის აუცილებელი აქციები. დღეს იქნება 3 საათზე კანცელარიასთან შეკრება, შემდეგ აქციებზეც ვიმსჯელებთ და ეს აქციები გაგრძელდება იქამდე, ვიდრე ის შედეგი არ იქნება მიღწეული, რაც ქვეყანას, თავისუფლებას ჭირდება. არასდროს, ამ ვითარებაშიც კი არ მიყვარს ჩვენი პარტნიორების ნაცვლად რამის პროგნოზირება, მათი განცხადებები მეტყველებს იმაზე, რისი თქმაც მათ უნდათ. რაც მე ვნახე, ბუნებრივია, ეს წნეხი გაგრძელდება, ჩვენ ნანახი გვაქვს როგორ ამთავრებენ ოლიგარქები, რომლებიც საკუთარი ხალხის თავისუფლების და ამ ხალხის მოკავშირე თავისუფალი სამყაროს წინააღმდეგ მიდის“, – განაცხადა გიგა ბოკერიამ.
„ის მოვლენები, რაც ბოლო დროს ვითარდებოდა და რაც დღეს დილით განვითარდა, პირობითად სამი ნაწილისგან შედგება, ესაა: სამართლებრივი, პოლიტიკური და საინფორმაციო. ჩემი აზრით, ბოლო ორი ფაქტორი ჭარბადაა წარმოდგენილი. მნიშვნელოვანია, რომ გამოძიებამ და სასამართლომ მაქსიმალურად სწრაფად, ფაქტობრივად შეუძლებლად მოკლე დროში აქცენტირება გააკეთოს სამართლებრივზე და მიიღოს სამართლიანი გადაწყვეტილება იმისთვის, რომ დანარჩენი ორი პუნქტი, პოლიტიკური და საინფორმაციო, შემცირდეს და აქცენტი სამართლებრივ ნაწილზე გაკეთდეს, რაც არ უნდა პოლიტიკური სარჩული ჰქონდეს ამას“,- აღნიშნა დავით სერგეენკომ.
„დარწმუნებული ვარ, ნიკა მელია ძალიან მალე თავისუფალი იქნება და ამას ყველა ერთობლივი ბრძოლით მივაღწევთ. ძალიან სირცხვილი იქნება ქართველებო, საქართველოს მოქალაქეებო ივანიშვილ-ღარიბაშვილის დიქტატურის დამყარება ქვეყანაში. ყველაფერს ხომ თავისი სახელი, სახე და ფორმა აქვს. ივანიშვილ-ღარიბაშვილის დიქტატურა ძალიან დიდი სირცხვილია. ამიტომ, მოვუწოდებ ყველას, თქვენი შვილების მომავლისთვის ადექით არა ნიკა მელიას, არა ჩემი, არა იმ ადამიანების, ვინც აქ ვდგავართ, არამედ თქვენი შვილების მომავლისთვის, გინდათ ღარიბაშვილის დიქტატურაში გაიზარდოს თქვენი შვილები? მაშინ ჩვენ ღირსება არ გვქონია. საერთოდ ყველანაირი დიქტატურა მიუღებელია, მაგრამ კომიკური დიქტატურა კიდევ უფრო დიდი უბედურებაა“,- განაცხადა ნინო ბურჯანაძემ.
„ბნელი ღამე და ქვეყნის დაქცევა მაშინ იწყება, როცა კანონი არ აღსრულდება. სხვათაშორის, ორ დღეში საქართველოს დამოუკიდებლობის დაცემის დღეა. დამოუკიდებლობის დაცემა სწორედ იმან განაპირობა, რომ ქვეყნის შიგნით იყო ბოლშევიკური მეხუთე კოლონა, რომელიც კანონს არ ემორჩილებოდა და ყველაფერს აკეთებდა სახელმწიფოსთვის ძირის გამოსათხრელად. დღეს საქართველოს სახელმწიფო ძლიერია, კანონი აღსრულდება, კანონს ყველა დაემორჩილება. ქვეყანას აზიანებს და ძირს უთხრის, როცა ქვეყანაში არიან ადამიანები, რომლებით აცხადებენ, რომ კანონზე მაღლა დგანან – ეს არ მოხდება. 1921 წლის 25 თებერვალს საქართველო დაღუპა იმან, რომ საქართველოში იყო მეხუთე კოლონა, რომელიც კანონს არ ემორჩილებოდა და ყოველ დღე აწყობდა დესტრუქციას”, – განაცხადა სოზარ სუბარმა ჟურნალისტებთან საუბრისას.
“რა თქმა უნდა, ჯობდა, რომ ნიკანორ მელია დამორჩილებოდა კანონს, ყოველგვარი წინააღმდეგობის გარეშე, მაგრამ მაინც მოისურვა და ეს იყო მათი დესტრუქციული გეგმის ნაწილი, მომხდარიყო აურზაური, რომელიც არ შედგა. პოლიციამ მაღალი პროფესიონალიზმი აჩვენა. პრაქტიკულად დაშავებულები არ არიან. მხოლოდ მცირედი ტრავმებია, არიან ექიმების მეთვალყურეობის ქვეშ. მათ საფრთხე არ ემუქრებათ და გაეწერებიან ბინაზე. უმთავრესია ის, რომ ქვეყანაში კანონის უზენაესობა კითხვის ნიშნის ქვეშ არ უნდა დადგეს. პრობლემური არის ის, რასაც აკეთებს “ნაციონალური მოძრაობა” და ე.წ. ფანჩატურული შეკრება. აბსოლუტურად ღირებულებას აცდენილი და გაერთიანებული მხოლოდ დესტრუქციის ქუდის ქვეშ, რომ რამენაირად ამ გზით მოიპოვონ ხელისუფლებაში სავარძელი, მაგრამ ეს მიუღწეველია. ვფიქრობ, დესტაბილიზაციის ხიფათი აქამდე უფრო იყო, ვიდრე ამის შემდეგ იქნება”,- განაცხადა დიმიტრი ხუნდაძემ.
ცნობისთვის, სპეციალური დანიშნულების რაზმმა „ნაციონალური მოძრაობის“ თავმჯდომარე ნიკა მელია დააკავა. სამართალდამცავებმა ნიკა მელია პარტიის ოფისში, საკუთარ კაბინეტში აიყვანეს. მანამდე კი პარტიის ოფისში სამართალდამცავებმა ე.წ. წიწაკის სპრეი გაუშვეს.
