ცნობილი ფაქტია, რომ 20 ივნისის მოვლენების შემდეგ ბიძინა გეგიძემ უმრავლესობის მიერ წარდგენილ ნიკა მელიას მანდატის შეჩერების საკითთხს პარლამენტში მხარი არ დაუჭირა. იმთავითვე გაჩნდა აზრი, რომ ამ გადაწყვეტილების გამო მას უთუოდ დასჯიდნენ, თუმცა თავად პარლამენტარი მიიჩნევდა, რომ იგი პარტიის ძირითადი პრინციპების ერთგულია და არ შეიძლება ცალკეულ საკითხზე განსხვავებული აზრი, პარტიულ უთანხმოებაში გადაიზარდოს.
,,ჩემი გუნდიდან გვერდზე გადგომა არ მჩვევია, უბრალოდ, პოლიტიკოსს მისი პრინციპებიდან გამომდინარე გადაწყვეტილების დამოუკიდებლად მიღების უნარი და თავისუფლების ხარისხი უნდა ჰქონდეს, – განუცხადა საქართველოს პირველ არხს საპარლამენტო უმრავლესობის წევრმა, ბიძინა გეგიძემ.
სად გადის თავისუფლების ზღვარი რთული სათქმელია, თუმცა გია ვოლსკი განმარტავს, რომ სხვა მრავალი თემა არსებობდა, თუნდაც სასამართლო რეფორმის საკითხი, სადაც ბიძინა გეგიძეს თანაპარტიელი კოლეგებისაგან განსხვავებული ხედვები ჰქონდა:
„ამის გარდა, იყო გამონათქვამები პოზიცია, თუნდაც შეუთანხმებელი განცხადებები, რომელიც ეხება არამარტო მელიას თემას, არის კიდევ სხვა ბევრი თემა, იქ სასამართლო რეფორმასთან დაკავშირებით, რომელსაც სადავო არ შეიძლება რამე ჰქონოდა, თუნდაც იმ პოზიციასთან დაკავშირებით, რომელიც ეხებოდა შს მინისტრის გადადგომას, როცა ყველას კარგად ესმოდა, რომ შს მინისტრზე არ იყო აქ საუბარი, აქ იყო საუბარი მცდელობაზე, ტოლობის ნიშანი დაესვათ დანაშაულებრივ ქმედებებთან, რომელიც გააჩნდა წინა ხელისუფლებას დღევანდელ სიტუაციას შორის და კიდევ ბევრი სხვა საკითხი, რაზეც ბოლო დროს მოისმინეთ თქვენ განცხადებები, რომ დაელოდება და მერე მიიღებს თავის პოზიციას, დარჩება თუ არა უმრავლესობაში. ვფიქრობ, ეს გარკვეული ულტიმატუმია, რაზედაც, რა საკვირველია, „ქართული ოცნების“ უმრავლესობა ვერ დარჩებოდა ამ საკითხებთან დაკავშირებით გულგრილი, ასე რომ, ვერ ვხედავ ამაში ტრაგედიას ან სკანდალურ თემას. პოლიტიკოსები სცილდებიან ერთმანეთს, პოლიტიკოსები უკავშირდებიან ერთმანეთს და ამ შემთხვევაში ეს დაცილება გახდა გარდაუვალი აუცილებლობა“, – აღნიშნა გია ვოლსკიმ 1tv-სთან საუბარში.
