მერი ბარაბაძე იუბილარია – სახალხო მსახიობსა და რეჟისორს კულტურის ცენტრმა იუბილე მიულოცა
“ულამაზეს, უნიჭიერეს და პოზიტიურ ქალბატონს, მსახიობ მერი ბარაბაძეს ვულოცავთ დაბადების დღეს.
ხონის კულტურის ცენტრში არსებული ბავშვთა ნიღბების თეატრის სულის ჩამდგმელი და რეჟისორი, რომელიც ჩამოყალიბდა 1994 წლის სექტემბერში, დღემდე ქალბატონი მერი ბარაბაძე გახლავთ.
თეატრის საესტრადო-სასცენო სასწავლებლის დასრულების შემდეგ იგი მღეროდა ანსამბლებში ,,პირველი ნაბიჯი” და ,,აისი”.
მერი ბარაბაძემ ხონის სახალხო თეატრის სცენაზე რამდენიმე საინტერესო სახე შექმნა, 1976 წელს სარაიონო კულტურის სახლის აგიტმხატვრულ ბრიგადასთან ერთად ჯერ რესპუბლიკური, შემდეგ კი საკავშირო ფესტივალის ლაურეატი გახდა, გადაიღეს რ. ესაძის ფილმში ,,ნეილონის ნაძვის ხე”.
გამოდიოდა ქუთაისისა და სამტრედიის თეატრების სცენებზე.
მის შესახებ წერდნენ: ,,მერი ბარაბაძე ყოველ როლთან ერთად იბადება, თავისი ყველა გმირის სულიერ სამყაროს ბოლომდე შეიგრძნობს-ხოლმე და შემდეგ ცოცხლდება მათში.”
სახელმწიფო თუ რაიონული თეტრების სცენაზე მერი ბარაბაძეს შესრულებული აქვს 40 დიდი და პატარა როლი, გადაღებულია მხატვრულ ფილმებში, მიღებული აქვს ჯილდო ქალის როლის საუკეთესო შესრულებისთვის;
არის საკავშირო და რესპუბლიკური ფესტივალების ორგზის ლაურეატი, დაჯილდოვებულია პრეზიდენტის ღირსების ორდენით, მიღებული აქვს სხვადასხვა სასხის დიპლომი.
საოცარია გაზეთ ,,თაობაში” დაბეჭდილი შეფასება: ,,ასეთი ქალი, ასჯერ დანაპყრობი _ დაუპყრობია. მასში არის რაღაც ჯადოსნური მარცვალი, ისტორიული მელანქოლია, ანდამატური ძალა, პლასტიკური მშვენიერება, თავაშვებული მომხიბვლელობა, უსაზღვროება და თავისთავადობა…”
მერი ბარაბაძის მიერ განხორციელებული სპექტაკლებია: ,,ნაცარქექია”, ,,მე, ბებია, ილიკო და ილარიონი”, ,,წუნა და წრუწუნა”, ,,კომბლე”, ,,ბაბაჯანას ქოშები”, ,,ფიფქია და შვიდი ჯუჯა”……..
ჩვენო მერიკო, დიდხანს მოგეხმაროთ თქვენი ენერგია ხონელი ახალგაზრდებისა და ჩვენი დასის დიდი და პატარა მსახიობების გასახარად.” – ნათქვამია კულტურის ცენტრის ადმინისტრაციის მიერ გავრცელებულ ინფორმაციაში.
