ინფექციური საავადმყოფოს ბოქსირებული განყოფილების უფროსის, მარინა ენდელაძის ინფორმაციით, გუშინ იტალიიდან ჩამოსულ მოქალაქეებს ცხელება უფიქსირდებათ, თუმცა მათი ანალიზის პასუხები ჯერჯერობით ცნობილი არ არის. მისივე თქმით, აღნიშნული ხვალ დილით გახდება ცნობილი.
ენდელაძის თქმით, 26 თებერვალს ინფიცირებულ პაციენტს, სავარაუდოდ, ხვალ აუღებენ განმეორებით ანალიზს, თუმცა მისივე თქმით, უარყოფით შედეგს არ ელოდებიან, რადგან მასაც ფილტვების ანთება აღენიშნებოდა.
„იტალიიდან გადმოყვანილ პაციენტებს, აქვთ ცხელება, მაგრამ ჯერჯერობით პასუხები არ მიგვიღია. ეს ალბათ იქნება გვიან დილით და ხვალ დილისთვის მოგახსენებთ მონაცემებს. სულ ველოდებით 15 პაციენტის პასუხს.
26 თებერვალს ინფიცირებული პაციენტის ანალიზის პასუხს ხვალ ავიღებთ სავარაუდოდ, იმიტომ, რომ იქაც იყო ფილტვების ანთება და არ ველოდებით, რომ აუცილებლად იქნება უარყოფითი. ამიტომ შეიძლება რამდენიმე დღე გადავწიოთ იმიტომ, რომ როდესაც პაციენტებს აქვთ პნევმონია, შეიძლება, გახანგრძლივდეს და ზოგადად 2 კვირა არ არის ის დრო, როდესაც აუცილებლად უნდა იყოს უარყოფითი. მოგეხსენებათ, ამ ვირუსს ახასიათებს ორგანიზმში ხანგრძლივი პერსისტირება“, – განაცხადა მარინა ენდელაძემ.
