ბიძინა ივანიშვილი წყალტუბოს მასშტაბულ რეაბილიტაციას გეგმავს და ამბობს რომ იმერეთი ჯანმრთელობის და ტურიზმის, ახალგაზრდობისა და განათლების მძლავი საერთაშორისო ცენტრი იქნება.
მისი გეგმის მიხედვით, რომელიც “ქართული ოცნების” ოფიციალურ გვერდზე გამოქვეყნდა წყალტუბოს გარდაქმნა 22 სასტუმროსა და 9 აბანოს გამოსყდივით და სრული რეაბილიტაციით დაიწყება.
გეგმის მიხედვით, რომელიც ბიძინა ივანიშვილის თქმით, წამყვანი შვეიცარული საკონსულტაციო კომპანიის, „KohL&Partners“ მიერაა შემუშავებული წყალტუბოში დამატებით უნდა აშენდეს
- წყლის პარკი,
- ტროპიკული ბაღი,
- გოლფის და ჩოგბურთის მოედნები,
- კლდეზე ცოცვის პარკი,
- სავაჭრო ცენტრი,
- კაფე-ბარები და რესტორნები.
ბიძინა ივანიშვილის განცხადებით წყალტუბოში დაგეგმილია საგანმანათლებლო ცენტრის გახსნა პროფილურ სპეციალობებში მოქალაქეების გადასამზადებლად.
“წყალტუბოს სიახლოვეს, ქუთაისთან განთავსებულია ორი თავისუფალი ეკონომიკური ზონა, აეროპორტი, დაგეგმილია სოფლის მეურნეობის ჰაბის მშენებლობა, რაც ასევე ხელს შეუწყობს ბიზნესისა და ტურისტების მოზიდვას.
დარწმუნებული ვარ, რომ ქუთაისის საუნივერსიტეტო ქალაქის მშენებლობასთან ერთად, წყალტუბოს სრულფასოვანი რეაბილიტაცია-განვითარება იმერეთის მხარეს გადააქცევს ჯანმრთელობის და ტურიზმის, ახალგაზრდობისა და განათლების მძლავრ, საერთაშორისო ცენტრად.” – წერს ბიძინა ივანიშვილი.
