თუ ზოგადად, მსოფლიოში რეგულარული ფრენების აღდგენის შემდგომ, რუსეთი შეცვლის საკუთარ გადაწყვეტილებას და აღადგენს ავიამიმოსვლას, როგორც არაერთხელ განვაცხადეთ, ჩვენ ამას მხოლოდ მივესლმებით, – ასე ეხმაურება საქართველოს საგარეო საქმეთა მინსიტრი დავით ზალკალიანი რუსეთის საგარეო უწყბის ხელმძღვანელის სერგეი ლავროვის განცხადებას, საქართველოსთან ავიამიმოსვლის აღდგენის შესახებ.
დავით ზალკალიანიის თქმით, პირდაპირ ავიამიმოსვლის შეწყვეტა ჩვენს ათასობით მოქალაქეს ცხოვრებას ურთულებს.
„როგორც საყოველთაოდ ცნობილია, საქართველოსა და რუსეთს შორის ავიამიმოსვლა შეწყდა რუსეთის მხარის გადაწყვეტილებით და, შესაბამისად, თუ ზოგადად მსოფლიოში რეგულარული ფრენების აღდგენის შემდგომ, რუსეთი შეცვლის საკუთარ გადაწყვეტილებას და აღადგენს ავიამიმოსვლას, როგორც არაერთხელ განვაცხადეთ, ჩვენ მხოლოდ მივესლმებით ამას, რადგან პირდაპირ ავიამიმოსვლის შეწყვეტა საგრძნობლად ურთულებს ცხოვრებას ჩვენს ათასობით მოქალაქეს, რომელიც რუსეთის ფედერაციაში სხვადასხვა სტატუსით ცხოვრობს და არც სავაჭრო-ეკონომიკური ურთიერთობების შემდგომ გაღრმავებაზე აისახება დადებითად. უნდა აღინიშნოს ასევე, რომ რუსეთის მოქალაქეებს საქართველოში არც ამ გადაწყვეტილების მიღების დროს და არც მას შემდეგ, არანაირი საფრთხე არ ემუქრებოდათ, რასაც მილიონზე მეტი ვიზიტორი ადასტურებდა“, – განაცხადა ზალკალიანმა.
მისივე თქმით, დიპლომატიური ურთიერთობების აღდგენის საკითხზეც კომენტარი არაერთხელ გაკეთებულა.
„საქართველოს ხელისუფლებისათვის მიუღებელია სამი საელჩო ქვეყნის ტერიტორიაზე და საკითხის განხილვაც კი გამორიცხულია ცეცხლის შეწყვეტის შესახებ 2008 წლის 12 აგვისტოს შეთანხმების შესრულების კუთხით ხელშესახები პროგრესის, ანუ დეოკუპაციის მიმართულები გადადგმული ქმედითი ნაბიჯების გარეშე. რაც შეეხება სავაჭრო წარმომადგენლობებს, ასეთ ფორმას საქართველოს კანონმდებლობა არ ითვალისწინებს. შესაბამისად მიგვაჩნია, რომ სავაჭრო-ეკონომიკური პრობლემატიკის განხილვა უნდა გაგრძელდეს ე.წ. აბაშიძე-კარასინის ფორმატში, სადაც ამ მიმართულებით კონკრეტული, მნიშვნელოვანი შედეგებია მიღწეული.
საჭიროების შემთხვევაში, შესაძლებელია თბილისსა და მოსკოვში, შვეიცარიის საელჩოების შემადგენლობაში არსებული საქართველოსა და რუსეთის ინტერესების სექციების პოტენციალის გამოყენებაც“, – აღნიშნა მინისტრმა დავით ზალკალიანმა.
სერგეი ლავროვმა ვიდეოკონფერენციის დროს განაცხადა, რომ რუსეთი საქართველოსთან ავიამიმოსვლის აღდგენის საკითხის მალე გადაწყვეტას იმდოვნებს.
2019 წლის 21 ივნისს რუსეთის პრეზიდენტმა ხელი მოაწერა ბრძანებას, რომლის თანახმადაც 8 ივლისიდან რუსულ ავიაკომპანიებს საქართველოში რუსეთის მოქალაქეების გადაყვანა აეკრძალათ. ვლადიმერ პუტინმა ეს გადაწყვეტილება მას შემდეგ მიიღო, რაც საქართველოში ოკუპაციის საწინააღმდეგო აქციები გაიმართა.
მთავრობის ინფორმაციით, საქართველო-რუსეთს შორის ავიამიმოსვლის აღდგენა იყო საუბრის ერთ-ერთი თემა დავით ზალკალიანისა და სეგრეი ლავროვის შეხვედრაზე ნიუ-იორკში.
