თურქეთში, ერთ-ერთი ავტოსალონის თანამშრომელი უფროსს ჩაიში კორონავირუსით ინფიცირებულ ნერწყვს უმატებდა. ამისთვის მან 70 დოლარად ინფიცირებული ნერწყვი შეიძინა. ინფორმაციას „უნიანი“ ავრცელებს.
სალონის მეპატრონე კორონავირუსით არ ინფიცირდა, ვინაიდან ეს ჩაი არ დაულევია. ბოროტი განზრახვის შესახებ მას სხვა თანამშრომლებმა უამბეს. როგორც იბრაჰიმ უნვერდიმ განაცხადა, მკვლელობის ასეთი უჩვეულო მეთოდის შესახებ მან პირველად გაიგო.
მას შემდეგ, რაც ბოროტმოქმედს გეგმა ჩაუვარდა, ის ბოსს დაემუქრა, რომ იარაღით მოკლავს. მან ასეთი შეტყობინება გაუგზავნა: „ვირუსით ვერ მოგკალი, შემდეგ ჯერზე თავში გესვრი“.
ავტოსალონის მფლობელმა პოლიციას მიმართა, რომელმაც ეს თანამშრომელი დააკავა. მას მკვლელობის მცდელობისთვის ბრალი წაუყენეს. სალონის მეპატრონესა და ბოროტმოქმედს შორის კონფლიქტის მიზეზები უცნობია.
