2022 წლიდან “თამბაქოს კონტროლის შესახებ“ კანონის კონკრეტული მუხლები ამოქმედდება.
როგორც თამბაქოს კონტროლის ალიანსის ხელმძღვანელმა გიორგი ბახტურიძემ “ბიზნესპარტნიორს“ განუცხადა, 2022 წლის იანვრიდან ძალაში შედის ნორმა, რომლის შესაბამისადაც, გახურებადი თამბაქოს პროდუქტის კოლოფებზე სამედიცინო გაფრთხილებასთან ერთად დატანილი იქნება პიქტოგრამები.
“დატანილი იქნება ის სურათებრივი გამოსახულებები, რაც თამბაქოს კოლოფზეა. პიქტოგრამების ფორმა უკვე მოძებნილია და მთავრობა უახლოეს დღეებში დაამტკიცებს“, – აღნიშნა გიორგი ბახტურიძემ.
გარდა ამისა, მისი თქმით, 2022 წლის 31 დეკემბრიდან ყველა ტიპის თამბაქოს კოლოფი იქნება ერთფეროვანი. კოლოფზე დატანილი იქნება ბრენდების სახელები სტანდარტული შრიფტით და ქვესახეობები, რათა როგორც გამყიდველს, ისე მომხმარებელს პროდუქტის იდენტიფიცირება არ გაუჭირდეს.
“ამის ნორმატიული აქტიც შემუშავებულია და უახლოეს პერიოდში დამტკიცდება“, – აცხადებს გიორგი ბახტურიძე.
წყარო – “ბიზნესპარტნიორს“
