2023 წლის 14 თებერვალს მოძრაობა „ხალხის ძალის“ მიერ მოხდა „უცხოური გავლენის გამჭირვალობის შესახებ“ კანონპროექტის ინიცირება, რომელიც რუსეთის ფედერაციის (ერთადერთი ქვეყნის, სადაც ამავე სახელწოდების კანონი მოქმედებს) მსგავსად მიზნად ისახავს სამოქალაქო საზოგადოების ორგანიზაციებისა და დამოუკიდებელი მედიის მოქმედებების შეზღუდვას, რაც თავის მხრივ ქვეყანაში ავტორიტარიზმის გაძლიერებას გამოიწვევს. კანონპროექტი ეწინააღმდეგება როგორც საქართველოს კონსტიტუციას, ასევე ქვეყნის საერთაშორისო ვალდებულებებს. ნიშანდობლივია, რომ თავის დროზე ევროპის საბჭოს ვენეციის კომისიამ რუსეთის ფედერაციის კანონი „უცხოურ აგენტებზე“ ევროპის საბჭოს სტანდარტების დარღვევად შეაფასა. ვენეციის კომისიამ აღნიშნა, რომ ეს კანონი „სტიგმატირებს სამოქალაქო საზოგადოების ორგანიზაციებს, ლახავს მათ რეპუტაციას და სერიოზულად აფერხებს მათ საქმიანობას“. მსგავსი უნგრული კანონი „უცხოეთიდან მხარდაჭერილი ორგანიზაციების გამჭვირვალობის“ შესახებ მართლმსაჯულების ევროპულმა სასამართლომ ევროკავშირის სამართლის დარღვევად ცნო.
„ხალხის ძალის“ განცხადება იმის შესახებ, რომ კანონით „უზრუნველყოფილი იქნება სახელმწიფოს უშუალო ჩართულობა მთელ რიგ პროცესებში, რომლებიც უცხოური დაფინანსებით ფიზიკური თუ იურიდიული პირების პრივილეგირებას ითვალისწინებს“, სამოქალაქო საზოგადოების ორგანიზაციების და დამოუკიდებელი მედიის წინააღმდეგ მიმართული პოპულისტური კამპანიის ნაწილია. სამოქალაქო საზოგადოების ორგანიზაციების უცხოური დაფინანსების წყარო უმეტეს შემთხვევაში, საქართველოსა და უცხოურ სახელმწიფოს (ან საერთაშორისო ორგანიზაციას) შორის დადებული შეთანხმებებია. ამ შეთანხმებებით გათვალისწინებული დაფინანსების ძირითადი ნაწილი სახელმწიფო სტრუქტურების გაძლიერებაზეა მიმართული და მას უშუალოდ საქართველოს მთავრობა განკარგავს. ამ დაფინანსებიდან სამოქალაქო საზოგადოების ორგანიზაციების საქმიანობისთვის (როგორიცაა მაგალითად მმართველობის გამჭირვალობის ხელშეწყობა, ადამიანის უფლებებისა და თავისუფლებების დაცვა, საჯარო პოლიტიკის შექმნაში მოქალაქეების ჩართულობის უზრუნველყოფა) გაცილებით მცირე წილი გამოიყოფა, რასაც სამოქალაქო საზოგადოების ორგანიზაციები კონკურსის საფუძველზე იღებენ.
პარიზის დეკლარაციისა და დახმარების ეფექტურობის სხვა შეთანხმებების საფუძველზე, საქართველოს სახელმწიფო ვალდებულია უზრუნველყოს უცხოური დახმარების ეფექტური მართვა, ხოლო დონორები ვალდებულნი არიან ეს დახმარება საქართველოს მიერ შემუშავებულ განვითარების სტრატეგიებს დააფუძნონ. უცხოური ფინანსური დახმარების ზედამხედველობას, მისი ეფექტურობის უზრუნველყოფის მიზნით, უკვე დიდი ხანია აწარმოებს პრემიერ-მინისტრის აპარატი, ფინანსთა სამინისტრო და სხვა შესაბამისი სახელმწიფო სტრუქტურები. აღსანიშნავია, რომ არსებობს უცხოური დაფინანსების წყაროებისა და მიმღებების რეესტრი და რეგულარულად ხორციელდება ამ დაფინანსების მიმღებთა ფინანსური და პროგრამული მონიტორინგი. უცხოური დაფინანსების მიმღები სამოქალაქო საზოგადოების ორგანიზაციები და მედია საშუალებები არ სარგებლობენ დამატებითი საგადასახადო შეღავათებით, ხოლო საქველმოქმედო სტატუსის მქონე სამოქალაქო საზოგადოების ორგანიზაციები ფინანსთა სამინისტროში ყოველწლიურად წარადგენენ დამატებით ფინანსურ და პროგრამულ ანგარიშებს. გარდა ამისა, საქართველოში მოქმედი სამოქალაქო სექტორის ორგანიზაციების უმრავლესობა გამჭირვალობის მაღალი სტანდარტის უზრუნველყოფის მიზნით, საჯაროდ წარმოადგენს ინფორმაციას კონკრეტული დონორებისა და მათ მიერ დაფინანსებული პროექტების შესახებ, როგორც საკუთარ ვებ-გვერდებზე, ასევე მხარდაჭერილი პროექტის ფარგლებში ჩატარებულ სხვადასხვა ღონისძიებაზე.
ევროპის ფონდი კიდევ ერთხელ გმობს „ხალხის ძალის“ მიერ ინიცირებულ კანონპროექტს და იმედს იტოვებს, რომ საქართველოს პარლამენტი არ მიიღებს მსგავს ანტიდემოკრატიულ, ქვეყნის განვითარების წინააღმდეგ მიმართულ კანონს.
